CEBU, Philippines - Nagpabilin pa gihapon ang kusog ni Christy Sevilleno-Tutor dihang iyang gilangkat ang 12K women's open title sa Urology Run niadtong Domingo didto sa Chong Hua Hospital.
Ang kanhi reyna sa Cebu running scene nga si Tutor milabang sa finish line sud sa 51 minutos ug 18.92 segundos. Nagsunod si Joeyry Lee alang sa ikaduhang dapit sa oras nga 52:00.00, samtang si Jhean Andrin mitugpa sa ikatulo sa oras nga 56:44.45.
Sa pikas bahin, ang reigning Milo Marathon regional champion nga si Adonis Singson midominar sa men’s class sa oras nga 41:27.55, gisundan nilang Ian Bernido (41:49.22) ug Jordan Bacong (41:54.77) alang sa ikaduha ug ikatulo nga dapit.
Si Joel Delposo nagpabiling hari sa short distance run ug iyang gisakmit ang 6K men's run sa oras nga 20:05.36. Si Bonifacio Munjas (20:30.67) ug Jorry Ycong (21:26.25) maoy miangkon sa sunod nga duha ka dapit.
Ang top three finishers sa 6K women’s class mao sila si Jojie Pepito (24:05.820), Lovely Fe Andrin (24:36.310) ug Ceizel Diongzon (25:39.700)
Sa 3K category, si Brode Codera (11:10.40) maoy misakmit sa titulo, samtang si Cherry Andrin (12:28.09) mao sab ang nidaog sa korona. (BANATSPORTS)