CEBU, Philippines - Giangkon sa Mandaue Landmasters-RDAK ang ikatulo nilang leg title, ning higayuna batok sa host MP GenSan Warriors, 76-65, sa SMC Liga Pilipinas Conference V didto sa GM Sports Complex niadtong miaging gabii.
Tungod niini, ang koponan nila ni team owner Joe Soberano ug Rick King segurado na nga musulod sa Super Leg karon nga usa nalang ka leg tournament ang nahibilin nga adto duwaon sa Cagayan de Oro City.
Sa makausa pa, ang ex-PBA guard nga si Ariel Capus mipusil na og mga puntos sa fourth period nga maoy nahimong yawi sa kadaugan ni coach Jun Tan kinsa lakip na karon sa lista sa mga coach sa Liga nga nakahipos og tulo ka leg titles.
Si Capus mitapos sa duwa sa iyang 27 puntos, samtang ang team captain sa Landmasters nga si Mark Magsumbol miposa og 14 puntos ug sentro nga si Marlon Basco mihipos og 12 puntos.
Sa sayu pa, ang Ilocos Sur CS Tigers ni Gov. Luis “Chavit” Singson and Coach Johnedel Cardel mitapos sa torneyo nga puno sa paglaum nga musulod sa playoffs dihang ilang gikawras ang Laguna Golden Lions, 82-79 sa battle-for-third place.
Williams ug Ivanovic mi-abante
Parehong mikulit og daog silang Venus Williams ug Ana Ivanovic sa women’s division didto sa Wimbledon.
Si Williams midaog batok sa 40 anyos ug unseeded nga si Kimiko Date-Krumm sa Japan sa tulo ka sets lakip ang usa ka taas kaayong tie-break, 7(8) - 6(6), 6-3, 8-6.
Maayo kaayong nakaduwa didto sa Wimbledon si Date-Krumm diin mi-abante siya sa semifinals niadtong 1996. Siya maoy ikaduhang labing tiguwang nga player sa women’s division nga miabot sa second round sa SW19 sa Open Era.
Ang sunod makontra ni Williams mao ang laing unseeded player nga si Maria Jose Martinez Sanchez sa Spain kinsa maoy nagtagak kang Jelena Jankovic sa first-round.
Sa laing bahin, midaog sab si Ivanovic batok kang Melanie Oudin sa iskor, 6-0,6-1 nga milungtand lang og 48 minutos.
Parehong nakahimo’g tulo ka double faults sila si Ivanovic ug Oudin ug nakahimo sab nga daghang unforced errors—pito kang Ivanovic ug siyam kang Oudin.
Ang dakong diperensiya sa maong sangka mao ang 22 ka aces ni Ivanovic kung itandi kang Oudin nga aduna lay upat ka aces.
Kanunay sab nakuha’g bentaha sa iyang serve si Ivanovic ug na-break niya ang serve ni Oudin sa lima ka higayon.
Sa second-round match, si Ivanovic, ang 18th-seeded nga Serbian, makigsangka batok sa unseeded nga Greek player nga si Eleni Daniilodou. Sa third round, posibleng ikasangka ni Ivanovic ang 13th seed nga si Agnieszka Radwanska.
Taga-Qatar kuhaon sa t-wolves?
Atol sa second round sa tinuig nga NBA draft kaniadtong Huwebes, daghang mga players gikan sa nagkalain-laing international nga torneyo ang gustong moduwa apan walay mikuha sa usa ka "unknown" o wala hi-ilhi nga si Tanguy Ngombo nga taga Qatar kinsa usa ka 6-6 forward gikan sa Qatar League,
Walay nakaila kang Ngombo hangtod nga wala kini mabutyag sa usa ka Jonathan Givony sa DraftExpress.com ug mi-tweet kalabot ni Ngombo nga nasigpatan unta sa Minnesota Timberwolves atol sa second round.
Husto si Givony ug dihang gi-draft sa Minnesota si Ngombo isip ika-58 pick overall, mipakita ug highlight ang ESPN pinaagi sa usa ka video clip gikan sa YouTube ug mikuha'g profile photo gikan sa Google Images samtang ang usa ka analyst nga si Fran Fraschilla mitandi kang Ngombo nga susama kang Sidd Finch nga usa ka baseball phenom nga gimani-obra sa usa ka ginganlan og George Plimpton aron mahimo kining usa ka April Fool's Day hoax niadtong 1985 issue sa Sports Illustrated.
Nagpakita nga si Fraschilla medyo nagsulti sa matuod nga aduna gyu'y tinuod nga player nga gi-ilang si Ngombo apan wala hisayri ang iyang sugilanon o kaagi.
Dihang gipili siya sa Wolves kaniadtong Huwebes, nagtuo silang mikuha sila'g 21 anyos nga player apan ang tinuoray si Ngombo 26 anyos na diay ug nakurat ang tagdumala sa Wolves. (GGM)(BANAT)