Una sa tanan, tugoti akong mo-greet og happy birthday sa publisher sa The Freeman ug Editor-in Chief sa Banat News Sir Juanito 'Nito' Jabat. Sir, happy birthday gikan sa imong mga staff sa Banat News.
Si Sir Jabat, kinsa gitawag nato og ‘Mr. Ironman’ maisip na nga usa ka living icon. Icon, in the sense nga usa na siya ka ‘institution’ sa natad sa journalism, dili lang dinhi sa Sugbu kun dili sa Central Visayas tungod sa kapin sa 30 na ka tuig niini nga pagserbisyo sa publiko isip tigbalita.
Motuo mo'g sa dili, kadaghanan sa mga inilang tigbalita karon dinhi sa atong dapit miagi sa mga kamot ni Mr. Jabat, dili lang isip editor kun dili isip higala, adviser ug uban pa.
Kanimo Sir Jabat more years to come!
* * *
Naghinam-hinam na siguro kitang tanan sa umaabot nga trilogy ni Manny Pacquiao ug Juan Manuel Marquez nga gitakda karong Nobiyembre 12.
Daghang mga boxing analysts ang miingon nga si Marquez lang maoy labing maayong boksidor nga gikasugat ni Pacquiao. Di gyud kini ikalimod tungod kay nakita man nga asentado ug nakatarog gyud kang Pacquiao ang pipila sa mga counter-punches ni Marquez sa duha nila ka panag-abot.
Daku ang akong pagtuo nga maglisod na si Marquez karong panahona, ilabi na nga sa 144 lbs. na ang catch weight limit nga dili naandan niya. Ikaduha, tiguwang na si Marquez komparar ni Pacquiao.
Bisan tuod og daw sigurado nang pildihon ni Pacquiao si Marquez ani nga sangka, daghan pa gihapon ang mga naghinam-hinam ilabi na sa habig sa mga Mehikano aron ipamatuod nga ‘nakawatan’ sa daog si Marquez sa unang duha ka sangka.
Sa habig sab sa mga Pinoy, daghan ang interesado aron maselyohan na gyud ang mga baba sa mga Mehikano kun tumbahon ni Pacquiao sa ikaduhang higayon si Marquez.
Sa unang panagsangka sa duha, tabla kini, apan daghan ang nagyawit nga Mehikano nga daog si Marquez, samtang mao usab sa fan base ni Pacquiao. Sa ikaduhang sangka, gipilde ni Pacquiao pinaagi sa unanimous decision si Marquez, mihilom ug mipakpak ang mga Pinoy nga nakapasamot sa kalagot sa mga Mehikano. Sa ikatulo kahang panag-abot, unya mapildi si Marquez? Mahilom na kaha ni sila?
* * *
Ang atong Fil-Am boxer nga si 3-time World Women’s Champion, The Female Fighting Pride of the Philippines and Bay Area’s own 3-time Women’s World Champion Ana 'The Hurricane' Julaton midaog pinaagi sa unanimous decision batok kang Angel 'Non-Stop' Gladney sa ilang non-title fight didto sa Dade County Auditorium sa Miami, Florida niadtong Biyernes.
Wala hinuon niya mapatumba ang kontra pero okey ra sab kay sa pildi. Ikaw bay tuyok-tuyokan og ipo-ipo di ba ka malipong. Wala mosaler ang 'Non-Stop' ni Gladney kay dili man moila og dalan ang ‘Hurricane’ hehehe!
* * *
PAHIBALO: Nagtigum ang mga miyembro sa Alpha Sigma Omega-Sigma Chi Gamma International Collegiate Service Fraternity and Sorority kagabii didto sa naandang binyu.
* * *
PAGTULON-AN: Lisud nang bakwion ang pulong kun kini midulot na sa natungnan.
* * *