CEBU, Philippines - Ang Central Visayas elementary girls gymnasts nidaog og silver medal sa unang adlaw sa aksiyon 2011 Palarong Pambansa kagahapon didto sa Polanco Municipal Gymnasium sa Dapitan City.
Sila si Dianne Sophia Navarro ug Francine Coyoca mihakot og silver sa team competition sa women's artistic gymnastics.
Ang katingalahan, kay ang CVIRAA trackters nga naandan na nilang mohakot og medalya sa unang adlaw sa kompetisyon sa nangaging mga katuigan, nasirohan ning higayona.
Sa basketball, ang Central Visayas elementary basketball team miposte og daog batok sa Region X sa iskor nga 61-57.
Sa badminton, ang Cebu miharos sa Region X sa elementary boys singles ug doubles categories nga didto giduwa sa Dapitan City Cultural and Sports Center.
Si Emilio Mangubat mipukan ni Miguel Gibran Pana, 21-18, 21-8 sa ilang unang sangka, samtang sila si Niño Jay Quindao ug Alfred Alejandro Armamento niagi pa og tulo ka sets sa wala pa nila buntoga silang John Emery Jumawan ug Joel Rey Pangasian, 21-15, 20-22, 21-18.
Sa women's class, ang Central Visayas nakatilaw sab og susamang kadaugan dihang ilang gidominar ang duha ka kategoriya batok sa Region II.
Si Jessa Diamante mipukan ni Laarni Moreno, 19-21, 21-15, 21-5, samtang ang tandem nilang Android Rose Tingson ug Tricia Merced Open yano kaayong mikulit og daog batok sa duo nilang Lynholly Baylon ug Ara Kynna Panganiban, 21-3, 21-2.
Sa volleyball, ang Central Visayas elementary boys ug girls spikers mikulit sa una nilang mga daog sa tagsa-tagsa nila ka dibisyon didto sa Bagting Open Court sa Dipolog City.
Ang CV boys spikers milampurnas sa CAR region sa straight sets, 25-12, 25-18, samtang ang Catmon Elementary School nga maoy niduwa alang sa girls squad mipilde sab sa Region V, 25-10, 25-13.
Ang secondary boys team gikan sa University of Southern Philippines Foundation midaog sab batok sa Region IV-B sa straight sets, 25-17, 25-19. (BANATNEWS)