Rose Aquarius nakasagunson sa 5th CESAFI Partners' Cup

CEBU, Philippines - Mihipos sunod-sunod nga daog ang Rose Aquarius Merchandising dihang ilang gitiwasan ang Winnner Beef Loaf, 67-54 sa nagpadayong 5th CESAFI Partners' Cup kagabii didto sa Cebu Coliseum.

Ning pagsuwat, nagpadayon pa ang kumbati tali sa San Marino Corned Tuna batok sa Ave Maria Sanctuary Park.

Sayo kaayong gilubong sa Rose Aquarius ang Winner Beef Loaf diin niposte kini'g 19-6 nga abante sa first period. Misuway og gukod ang Winner sa second period, apan pakyas sila, hinuon mihiyos ang labaw ngadto na lang sa kuwatro puntos sa halftime, 28-24.

Nabalikan sa kalagsik ang Rose Aquarius sa second half diin ila na nga gidominar ang duwa sukad niadto.

Sila si Anthony Linao ug Joseph Sedurifa maoy nangu sa Rose Aquarius nga adunay tag-11 puntos, samtang ang Winner nga nagbitay karon sa kinailawmang bahin sa standing sa ilang 1-7 nga baraha, gipangulohan ni Chester Curso nga maoy bugtong nakahimo’g double figures pinaagi sa iyang 17 puntos. (BANAT NEWS)