Back-to-back tuyo sa Rose Aquarius

CEBU, Philippines -  Lab-as pa gikan sa ilang impresibong kadaugan,  77-69 batok sa Lion Tiger, ang Rose Aquarius Merchandising laraw mo-iskor og laing daog batok sa Winner Beef Loaf karong gabii sa pagpadayon sa 5th CESAFI Partners' Cup diha sa Cebu Coliseum.

Ang Rose Aquarius ni coach Raul Latonio Sr. nipukan sa Winner Beef Loaf sa first round, 89-75.

Sa laing bahin, ang nagsukarap nga Winner Beef Loaf gusto sab nga mopukan sa Rose Aquarius aron mapun-an ang ilang daog. Ang Winner nahimutang karon sa kinailawmang bahin sa standing bitbit ang 1-6 nga baraha.

Ang Rose magsalig nilang Fritz Dajalos, Joseph Sedurifa, Lawrence Maraño ug sa managsuong Ferraren nga sila si Earvin ug James, samtang si Chester Curso gilaumang mangulo sa Winner Beef Loaf uban nilang Allan Dimco, Steve Castro, Franklyn Batiquin ug Floyd Taboada ug pipila lang kanila.

Sa laing duwa, naglaraw sab ang Ave Maria Sanctuary Park pagkulit og laing daog batok sa San Marino Corned Tuna, kinsa ilang gipanitan, 92-57.

Ang 3-4 nga Ave Maria mosalig nilang Abulaiz Sulaiman, Jason Nudalo, Banjo Capillar, Jason Olbedado, Midget dela Rama, Michael Bucayan, Renzo Senining ug Matthew Parker. Ang San Marino naglaum nilang Rene Pacquiao, Eleazar Armecin, Bonifacio Guillena, Joseph Nalos, Junnnard Pineda ug Clyvven Limalima.  (BANATSPORTS)