MP midemolis sa MAJOS

CEBU, Philippines -  Ang Marty Pimentel (MP) Customs Brokerage midemolis sa MAJOS Brokers, 94-57 sa 1st Cebu Customs United Personeros Association (CCUPA) basketball tournament didto sa Benedicto College gym sa Brgy. Banilad, Mandaue City.

Sa sayo pa, midaog ang Alin Customs Brokerage pinaagi sa default batok sa CMM Brokers, kinsa gikatahong aduna lamang kini unom ka players.

Ang 37 puntos nga kadaugan sa Pimentel maoy labing daku nga biya sa     maong torneyo.

Si Kenneth Maningo maoy nanginit og maayo alang sa Pimentel nga mipabuto og 22 puntos nga miinat sa ilang baraha ngadto sa 3-1.

Si Rizzan Herbito, usa sa tulo ka sentro sa Pimentel, miamot og 14 puntos.

Ang Pimentel ni skipper Francis Ibo   nagkinahanglan lang modaog batok sa MS Trucking   aron mo-abante sa semifinals.

Si Vans Monden adunay 21 puntos alang sa MAJOS nga nakatilaw sa ilang ikatulong pilde batok sa usa ka daog. (BANATSPORTS)