CEBU, Philippines - Usa ka requiem mass ang ipahigayon sa University of Cebu (UC) karong Sabado sa alas-7 sa gabii agi'g pagtamod sa ilang mipanaw nga kanhi school coach Mariano 'Dodong' Agas Sr.
Si Agas namatay niadtong Biyernes Santo, Abril 22.
Aduna siya'y lima ka anak - Mariano Jr., Sammy, Roderick, Roger ug Brenda ug adunay 18 ka mga apo. Ang iyang mga anak atua na karon nanimuyo sa California, USA
Ang lubong gikatakda karong Domingo, Mayo 1 human sa ala-1 sa hapon nga requiem mass didto sa Sto. Rosario Parish Church.
Si Agas maoy usa sa high school coach sa UC (kanhi CCC Baby Executives) nga adunay labing daghang daog.
Nabantog og maayo ang iyang ngan dihang naka-iskor siya’g back-to-back title atol sa 1987-1988 National Inter-Secondary didto sa Baguio ug sa Manila.
Ilang gipilde ang San Beda Red Cub nga kanhi gipangulohan nilang Benjie Paras ug Ronnie Magsanoc didto sa Baguio ug nadepensaan ang ilang korona pagka sunod tuig dihang ilang gilampurnas ang Far Eastern University (FEU) Baby Tamaraws sa Manila.
Daghan sab siya’g korona nga nahipos sa karaang CAAA nga karon CESAFI. (BANAT NEWS)