CEBU, Philippines - Mipatigbabaw ang Light team dihang gihabolan nila sa ilang kahayag ang Dark team, 54-41, samtang ang Rookies misulbong sab batok sa Sophomores, 61-57 3rd F. Llamas Youth Association (FYA) All-Star Game didto sa sitio Manggahan open court sa barangay Punta Princesa, ning dakbayan.
Ang mga mananaog sa All-Star Game side events mao sila si Ago Estella sa CRV nga maoy mihawod sa skills competition, Burnong Endrina sa ANKLA nga maoy bag-ong hari sa 3-point shootout. Sila si Johnrey Arreglo ug Emac Martillan sa Ernest Jay maoy kampiyon sa two-ball competition ug si Dodong Cabigas sa Matthew ang labing unang slam dunk champion.
Si Daniel Enriquez sa team Orillaville miposa og 20 puntos aron pangulohan ang Light team, samtang si Dondon Cadungog miabuno og 13 puntos.
Si Estella lang ang bugtong player sa Dark team nga mibahog og double figures sa iyang 10 puntos.
Sa laing bahin, sila si JR Laurente ug Wendell Ramoneda nagkumboya og 28 puntos alang sa Rookies, samtang si Johnrey Cabañes miposa og 16 puntos alang sa Sophomores.
Ang FYA All-Star games gipaluyohan sa Harold Hotel, MJDL Brokers ug ni barangay councilor Boy Atillo.
PUNTOS MATAG USA
Unang duwa:
Rookies (61) - Laurente 16, Ramoneda 12, Sydiongco 11, Cajocson 7, Aglipa 6, Avila 4, Abella 3, Tabar 2
Sophomores (57) - Cabañes 16, Tomada 14, Sabalande 14, Abella 13, Albarracin 7, Oropa 5, Auza 4, Rabi 1
Ikaduhang duwa:
Light (54) - Enriquez 20, Cadungog 13, Pardenilla 6, Villalver 6, Masongsong 4, Ramoneda 3, Basalo 2
Dark (41) - Estella 10, Caballero 9, Cabigas 8, Patalita 6, Limbaga 4, Torrelisa 2, Arias 2
(BANAT NEWS)