Salido mi-TKO ni Lopez
CEBU, Philippines - Daw natuk-an sa ilang mga laway ang tibuok nasud sa Puerto Rico human napukan ang ilang garbo nga si Juan Manuel Lopez sa mga kamot sa Mehikanong si Orlando Salido kagahapon didto sa Ruben Rodriguez Coliseum sa Bayamon , Puerto Rico.
Atubangan sa libuan niya ka mga kababayan nalup-og si Lopez dihang gipauwanan og mga nagpungasi nga kumo ni Salido kinsa milampos pagsakmit sa WBO featherweight title pinaagi sa eight round technical knockout.
Walay nagtuo nga mao kini ang mamahimong resulta sa away tungod kay grabe ka inilog si Lopez kinsa sayung mipakita sa iyang kusug sa unang upat ka rounds.
Apan kalit lang nausab ang hapak sa hangin dihang nagsugud og pasulod si Salido sa iyang mga kombinasyon nga mitay-og ni Lopez.
Pag-abot sa seventh round, nagtinubagay sa ilang mga makabungog nga kumo ang duha ka boksidor, apan mas mipatigbabaw ang kusug ni Salido.
Sa misunod nga round, nakita ni Salido nga nasakitan na si Lopez sa iyang kanunay'ng pag-atake, hinungdan nga iya kining gidap-ig sa pisi dayun buhi og mga pampatay nga kombinasyon sa ulo.
Sa maong kadaugan si Salido misaka ngadto sa record nga 35-11, 23KOs, samtang si Lopez nakahiagum sa labing una niyang pilde sulod sa 31 ka away. (LPM gikan sa boxingscene.com)
- Latest
- Trending
