Nikki Pimentel nagbahis 0g 24 puntos

CEBU, Philippines - Wala kapugngi sa iyang pagmangtas ang 14-anyos nga estudyante sa Sacred Heart School-Ateneo de Cebu nga si Nikki Pimentel kinsa maoy nangu sa team sa iyang amahan ang Marty Pimentel (MP) Brokers dihang ilang gibukbok ang bag-ong sakop nga CMM Brokers sa iskor, 102-71 kaniadtong Sabado atol sa nagpadayong 1st Cebu Customs United Personeros Association (CCUPA) basketball tournament didto sa Benjamin Solon Memorial Gym sa barangay Cogon Ramos, ning dakbayan.

Sa laing duwa, naka-ipsot ang host CCUPA sa usa ka kulba-hinam kaayong duwa dihang ilang gipukan ang mas paboritong MJDL Brokers//MS Trucking, 76-72 sa usa ka come-from-behind fashion samtang sa kataposang duwa niadtong Sabado, gipakuratan sa CEBAMA Brokerage ang Canillas-Gonzales (CG) Brokerage sa iskor, 72-53.

Ang Pimentel ug ang CCUPA nagtabla na karon alang sa liderato sa parehong 2-0 nga baraha ug magtakos sila karong umaabot Sabado diin ang modaog sa gitawag og finals preview maoy solo leader ug posibleng motapos sa elimination isip top seed.

Sa pagsugod pa lang gani sa first period, daan nang nanginit si Pimentel ug siya maoy nangu sa ilang team sa iyang career-high 24 puntos samtang si Elmar Miscala mibahug og 21 puntos.

Wala na kaayo kinahanglana ang mga puntos nilang Noel Medalle ug Kenneth Maningo tungod kay maayong pagka-katag ang ilang opensa ug human ilang gibiyaan ang CMM sa third period, 59-45 ila pa gyud kining gitiwasan didto sa fourth quarter dihang milabaw sila’g 26 puntos, 79-53 sa jumpshot sab ni Pimentel.

Bugtong si Jhonory Pastoran maoy player sa 0-2 nga CMM nga mikulit og double figures sa iyang 19 puntos.

Sa laing bahin, ang beteranong sentro nga si Takloy Moral maoy nangu sa CCUPA sa iyang 27 puntos nga naglakip sa krusyal kaayong three-point play sa nahibiling 11 segundos sa duwa.

Ang split charities ni Moral sa may 29.3 segundos maoy naghatag sa CCUPA og 73-72 nga bentaha apan misipyat sa ilang kataposang ball possession ang MJDL ug sa return play, nakakubit og foul si Moral sa iya untang pagsuway og drive gikan sa foul line aron mahingpit ang three-point play og ingon man mahimong bayani sa CCUPA.

Si Moral giabagan sa iyang kababayan nga taga Limasawa island ang abtik nga point guard nga si Francis Palero kinsa midugang og 17 puntos.

Si Jaymar Elloren maoy nangu sa 1-1 nga MJDL sa iyang 15 puntos apan ang iyang mga sipyat sa free throws maoy naghatag og higayon sa CCUPA aron mahingpit ang ilang comeback bid.

Sa laing bahin, ang daog sa CEBAMA batok sa CG maoy ilang unang daog sa duha ka duwa samtang ang nauwahi, midailos ngadto sa 1-2 nga baraha.

Puntos matag usa:

First Game:

Pimentel (102)— Pimentel 24, Miscala 21, Pangue 10, Herbito 8, Manlosa 6, Arong 6, Ibo 6, Bensi 4, Largosa 3, Condes 3, Medalle 2

CMM (71)— Pastoran 19, Cabanda 7, Villarin 7, Cabañero 7, Pastor 6, Rosal 6, Deresas 6, R. Munda 3, Dacumos 3, Munda 1 Halftime: 44-30

Second Game:

CCUPA (76)— Moral 27, Palero 17, Gelbolingo 6, Villagrasya 6, Agustinez 5, Villaronza 5, Castillo 4, Sagario 2

MJDL (72)— Elloren 15, Chio 12, Gambe 7, Palmero 6, Jordan 5, Medalle 5, Abellana 5, Wine 4, Cal 4, Villacastin 2, Li 2, Arreglo 2 (BANAT NEWS)