CEBU, Philippines - Ang Talisay City Sports Commission sa abag sa Talisay City Government mopahigayon na usab sa ilang tinuig nga Summer Sports Clinic didto sa Talisay City Sports Complex.
Ang summer clinics naglakip sa 10 ka mga events nga mahimong apilan sa kabataan karon panahon sa bakasyon.
Kini mao ang basketball, volleyball, badminton, chess, swimming, lawn tennis, table tennis, taekwondo, boxing ug softball.
Ang softball, lawn tennis, table tennis, taekwondo, swimming, chess ug boxing clinic nasugdan na niadtong Lunes, apan manawat pa gihapon sila og mga estudyante.
Ang softball didto gipahigayon sa Talisay City Central School, ang lawn tennis sa Talisay City tennis court, samtang ang table tennis, chess ug taekwondo sa Talisay City Hall ug ang boxing sa Talisay City Multi-purpose gym.
Sa mga gustong magkat-on og basketball ug volleyball, ang clinic adto himuon sa Talisay City Sports Complex, ang swimming adto sa Aqua Cainta Resort.
Ang registration fee sa basketball nagkantidad og P600, samtang P550 sa swimming ug P250 sa chess. Ang ubang events adunay entry fee nga P200. Gawas sa sports clinic, may pagahimuon sab nga dance ug arts lessons didto sa Talisay City Hall. (BANATSPORTS)