CEBU, Philippines - Wala makahuygo ang higanteng sentro nga si Junemar Fajardo nga maoy labing ngil-ad niyang performance sa iyang career, apan gitubos kini sa torotoy'ng 5-foot-6 shooting guard Gerald Ampoon aron hatagan ang Gaisano Capital og daog batok sa Ave Maria Sanctuary Park, 72-68 sa 5th CESAFI Partners' Cup niadtong Martes sa gabii didto sa Cebu Coliseum.
Si Fajardo igo lang ni-iskor og tres puntos ug ang iyang kabugnaw gipahimuslan og maayo sa Ave Maria, kinsa nilabaw og 11 puntos, 44-33 sa nahabiling 7:24 minutos sa third period.
Wala hinuon magdugay ang pagdominar sa Ave Maria sa duwa kay ang Gaisano Capital nga gibitoonan sa University of Cebu (UC) Webmasters, mitapos sa maong kuwarter pinaagi sa 17-4 run aron mailog pagbalik ang labaw, 50-48 sa 3-pointer ni Archie Batua.
Bisan og daghan ang angayan nga matawag nga bayani, si Ampoon maoy labing masidlakon nga mi-iskor og 12 puntos alang sa Gaisano Capital nga temporaryo nag-una sa liderato bitbit ang 2-0 nga baraha.
Si Quinton Brian Heruela, Robinson Mohammad ug Edward Pao nakatabang sab og daku sa opensiba ilabi na sa final period.
Si Jason Nudalo milansang og 16 puntos alang sa Ave Maria nga nagbitbit og 1-1 nga baraha.
Puntos Matag Usa
Gaisano Capital (72) - Ampoon 12, Heruela 9, Batua 9, Caytona 9, Mohammad 7, Pao 5, Pogoy 5, Magallanes 5, Aranas 4, Fajardo 3, Delos Santos 2, Labolabo 2
Ave Maria (68) - Nudalo 16, Abing 8, Dela Rama 7, Sanchez 7, Olbedado 7, Capillar 5, Sincgo 4, Tabaloc 4, Palileo 4, Suliman 4, Lajato 2. – BANAT NEWS