Ccupa ug majos daog

CEBU, Philippines - Parehong mikulit og yanong kadaogan ang Cebu Customs United Personeros Association (CCUPA) ni playing coach Yoly Cena ug ang MAJOS Customs Brokerage atol sa ilang malamposong debut sa nagpadayong 1st CCUPA basketball tournament kaniadtong Sabado didto sa San Roque Parish gym sa Subangdaku, Mandaue City.

Sa primerong duwa, gilubong sa CCUPA ang Sugbupim Brokers, 74-52 ug gisundan kini sa kadaogan sa MAJOS kinsa milubong sab sa Canillas and Gonzales (CG) Brokerage, 82-56.

Si Loreto Castillo miburak og upat ka three-pointers sa iyang topscoring nga 28 puntos samtang si Takloy Moral midugang og 13 puntos.

Misamot kalig-on ang CCUPA tungod sa presensiya ni kanhi UV under trainee ug point guard Francis Palero kinsa migamit sa iyang kaabtikon ug gikusgon aron makatabang pag-ayo sa opensa ug ingon man sab sa depensa.

Bisan og igo lang siyang miamot og nuybe puntos, wala makita sa stastistics ang uban niyang nahimo alang sa kadaogan sa CCUPA. Kuntento ug malipayon kaayo si Cena ug wala na lang niya pasudla ang iyang kaugalingon.

Ang Sugbupim gipangulohan ni Mark Gornez kinsa miposa og 12 puntos lakip ang usa ka triple shot ug si Mejie Cabañero miamot og 11 puntos.

Sa laing duwa, mihagdaw og 19 puntos si Kenneth Yurag aron pangulohan ang MAJOS samtang sila si Erlito Avenido ug Bobong Monden midugang og 14 ug 10 puntos matag usa. Sayo kaayong nanginit si Avenido ug mibahug og upat ka triples. Sila sab ang naglabaw halos sa kinatibuk-ang duwa gawas lang sa pagsugod sa first period.

Si Amay Palad maoy nangu sa CG Brokers sa iyang 12 puntos ug si Alex Pangan midugang og 10 puntos. Walay swerte ang CG tungod kay wala makahuygo silang power forward Marvin Sillar ug shooting guard Ferdie Sigue.

Si Art Gonzales, co-owner sa CG, miamot lang og dos puntos. Ang coach mao si Roy Canillas, ang co-owner sa CG nga kanhi sab topnotcher sa Customs brokerage licensure exam. Puntos matag usa:

First Game:

CCUPA (74) — Castillo 28, Moral 13, Palero 9, Sagario 7, Diaz 6, Villaroza 3, Cedeño 3, Solidarios 2, Villagrasya 2

Sugbupim (52) — Gornez 12,Cabañero 11, Durban 6, Morre 4, Nacario 4, Bongon 4, Bendejo 4, Dinola 3, Manulat 2, Viodor 2, Bacus 1

Second Game:

MAJOS (82) —Yurag 19, E. Avenido 14, B. Monden 10, Lim 8, Avenido 7, Magsalay 6, Legaspi 5, Tangkay 4, Dioneda 2, Elorde 2, Ompad 2, Monden 2

CG Brokers (56) — Palad 12, Pangan 10, Villa 9, Sillar 7, Sigue 6, Belarmino 5, Yap 4, Dela Cerna 3, Gonzales 2 (GGM)

Pacman supak sa hukom ni Donaire

Kung siya lang ang pabut-on sa karera sa iyang higala nga si Nonito Donaire, mas gusto ni Manny Pacquiao nga magpabilin ang bantamweight champion sa Top Rank Inc. kaysa sa Golden Boy Promotions.

Ang Sarangani Province Representative nga si Pacquiao hingpit nga mibuak sa iyang pagpakahilom aron muhatag sa iyang habig sa isyu nga may kalambigitan ni Donaire ug sa Top Rank Inc. ni Bob Arum nga maoy nagkupot sa iyang karera sa boksing.

“Para sa akin, kung ako ang nagdesisyon, mas mabuti kung nagstay siya sa Top Rank,” matud pa sa eight division world champion.

Hinuon namahayag si Pacquiao nga anaa na sa husto nga edad si Donaire aron mohimo og hukom alang sa iyang kaugalingon og kung unsay tan-aw niini nga makaayo sa iyang karera.

Si Donaire gikabalak-ang dili maka-away samtang nag-ungong pa ang gipasakang kaso sa Top Rank Inc. batok kaniya kabahin sa pagpirma niya og four-year contract sa GBP bisan pa og wala mapasu ang kontrata niini.

Kahinumduman usab nga si Pacquiao nalambigit sa susamang kontrobersiya ni Donaire niadtong tuig 2006 human gitanyagan siya og kontrata sa GBP nga dali ra usab nga gialkontra sa Top Rank Inc. (LPM gikan sa ABS-CBN news)