65K Ultra-marathon mosikad karong Mayo 1

CEBU, Philippines -  Tungod sa hangyo sa mga local runners dinhi sa Sugbu, ang Front Runner Magazine mopahigayon na usab og laing long distance run nga uloha'g Labor Day "Coast to Coast" 65K ultra marathon karong Mayo 1.

Ang lumba adto manukad sa karaang Toledo City Hall ug matapos diha sa Cebu Provincial Capitol ground.

Human sa malampuson nilang 50K ultra marathon niadtong miaging Nobiyembre, si race organizer Jonnel Mendoza nagkanayon nga nakadawat siya og mga positibo nga tubag   gikan sa mga Cebuano running enthusiasts nga maoy nakaagni kanila nga mopahigayon og laing ultra marathon race.

Gikan sa 182 ka entrante nga misalmot sa unang lumba, si Mendoza namahayag nga posibling moabot ngadto sa 200 modagan niini nga edisyon.

Gipasalig ni Mendoza nga dili na mausab pa ang nahitabong kontrobersiya sa unang lumba. Giingon nga adunay pipila ka runners ang wala managan ug nanakay paingon ngadto sa finish line.

"We have our secret marshals in position to check on the runners," matud pa ni Mendoza atol sa press conference kagahapon didto sa Parklane Hotel. "I respect the Cebuano people so much and I hope wala nang dayaan."

Ang tanang runners nga makalabang sa finish line makadawat og limited edition finisher shirt ug souvenir gikan sa Front Runner Magazine.

Aduna kini registration fee nga P1,200. Mahimong magparehistro didto sa Runnr sa Ayala Center-Cebu o mahimo sab nga mokontak ni Mendoza sa numero 09178030664. (BANAT NEWS)