Mga langyaw'ng boksidor misaad og daog
CEBU, Philippines - Dili buot si Rosendo 'El Matador' Vega nga mahisama sa nadangatan sa iyang mga kababayan nga nangaparot sa ilang pagpanulong dinhi sa Pilipinas ug mibahad kini nga iyang pildihon ang ALA fighter Milan 'El Metodico' Melindo atol sa ilang away sa main event sa "Pinoy Pride 4: Philippines vs. The World" karong Sabado diha sa Waterfront Cebu City Hotel and Casino.
"I trained hard for two months and I am very serious in beating Melindo for Mexico," matud ni Vega atol sa press conference kagahapon didto sa Moons Cafe sa Asiatown I.T Park.
Si Vega (16-6, 11KOs) miingon nga wala siya malisang ni Melindo bisan pa sa kadaugan sa Pinoy batok sa mga elite fighters sa flyweight division lakip na ngadto ni former world champion Carlos Tamara sa Columbia.
Si Vega usa lang sa lima ka langyaw'ng boksidor nga anaa karon sa Sugbu uban ang paglaum nga modaog batok sa ilang mga Pinoy nga kaatbang.
Lakip na niini si Tanzanian super flyweight king Francisco 'Black Panther' Miyeyusho nga makigbatok ni ALA knockout artist AJ 'Bazooka' Banal.
Himuon usab nga inspirasyon ni WBO AsPac super bantamweight champion Kenichi Yamaguchi sa Japan ang nahitabong linog ug tsunami sa ilang nasud aron mosakmit og daog batok ni Marjohn Yap.
Sila si Canadian prospect Steve Claggett ug Indonesian super flyweight Jemmy Gobel makigsangka batok nila ni Romeo Jakosalem ug OPBF flyweight king Rocky Fuentes.
Sa laing bahin, ang lima ka mga langyaw'ng boksidor mopahigayon og public workout karong alas-5 sa hapon diha sa Parkmall.
(BANAT NEWS)
- Latest
- Trending
