SWU, CDU Spartans abot sa finals

CEBU, Philippines - Gipakuratan sa Southwestern University (SWU) ang topseed University of San Carlos (USC) Team A, 66-61, aron moabante sa finals sa 1st Alberto’s Pizza Cup Nursing Edition basketball tournament didto sa University of Southern Philippines Foundation (USPF) gym sa Brgy. Lahug, ning siyudad.

Ang SWU makigharong sa Cebu Doctors' University Spartans, kinsa miabante sab sa finals human gipalagpot ang igsuong koponan CDU Nursery, 67-46.

Ang SWU ug Spartans magsangka alang sa korona sa tinaktakay nga kampiyonato karong adlawa sa mao gihapon nga binyu.

Kontrolado sa USC ang tempo pagsugod sa duwa diin gitapos nila ang unang kuwarter sa iskor nga 21-15, apan ang SWU mibawos aron ilogon ang momentum sa halftime, 35-31.

 Mihulga ang USC sa third period ug misikit sa iskor, 49-50 paghuman sa maong kuwarter, apan ang SWU daling nakarekober ug naka-eskapo dala ang singko puntos nga kadaugan.

Sa laing duwa, ang CDU Spartans yano kaayong miangkon og luna sa finals human gilubong ang CDU Nursery, 67-46.

Nagbagang opensa ang gipauwan sa Spartans diin miposte kini og 12 puntos nga labaw sa halftime, 35-23.

Ang Spartans padayon sa ilang walay puas nga opensiba sa second half aron angkonon ang 21 nga kadaugan. (BANATSPORTS)