Pistons nakaligis

CEBU, Philippines - Nakaginhawa’g lawom si coach John Kuester ug dayong gawas padung sa korte bitbit ang 120-116 nga kadaogan batok sa Utah Jazz kagahapon sa nagpadayong National Basketball Association (NBA) didto sa The Palace of Auburn Hills sa Michigan.

Kini nahitabo human sa malaksot nga kapildehan sa Pistons batok sa Philadelphia Sixers dihang unom lang ka players ang gigamit ni coach Kuester tungod kay wala kini motambong sa ilang practice ug iya kining gidisiplina.

Si Rodney Stuckey miburak og 28 puntos ug mihimo’g krusyal kaayong steal sa kataposang usa ka minuto aron pagselyado sa kadaogan.

“We’ve had a lot of interesting things happen to our team. The guys that were out there tonight, God bless them. They really worked hard tonight. This shows that no one is entitled to anything. You earn respect every day, not from the past,” matod pa ni Kuester.

Sila si Stuckey ug Austin Daye uwahing miabot alang sa ilang shootaround ug wala moduwa kaniadtong Biyernes batok sa Sixers apan miduwa kagahapon batok sa Jazz. Si Daye mi-iskor og 18 puntos ug 11 niini gikan sa fourth quarter.

Si Paul Millsap maoy nangu sa Jazz sa iyang 23 puntos uban ang 11 ka rebounds.

Si Will Bynum kinsa miduwa ug 48 minutos batok sa Philadelphia, maoy naghatag sa Detroit og labaw pinaagi sa iyang three-point play alang sa 111-108 may 1:52 ang nahibiling oras sa duwa.

“This was fun.We had a lot of energy out there. I know that we shot the ball well, but I think the effort was the important part,” nagkanayon si Bynum.

Misikit ang Utah, 112-114 dihang mi-iskor sa ilawom si Al Jefferson sa kataposang 27.4 segundos apan human sa duha ka free throws ni Stuckey, iyang natapik sa gawas ang assist gikan sa Jazz aron pagselyado sa kadaogan.

Sa laing duwa, midaog ang Boston batok sa LA Clippers, 99-92, gilubong sa Memphis ang Sacramento, 120-92, naka-ipsot ang Dallas batok sa Washington, 105-99, gisungay sa Chicago ang Milwaukee, 83-75 ug gilubong sa Houston ang New Jersey, 123-108. - GGM gikan sa NBA.com