CEBU, Philippines - Sa dili pa nila ipadayon ang subsob nga training alang sa umaabot nilang sangka, ang tulo ka ALA world title prospects mopahigayon una og public sparring sessions karong hapon diha sa Parkmall.
Sila si Milan Melindo, AJ Banal ug Rocky Fuentes nga maoy mobida sa "Pinoy Pride 4: Philippines vs. the World" karong Marso 19 didto sa Watefront Hotel and Casino, tagsa-tagsang mosaka sa ring aron ipakita ang ilang kapaspas ug kaabtik atol sa sparring session.
Ang tulo ka mga boksidor nga anaa na sa tunga-tungang bahin sa ilang training didto sa ALA Gym mogahin usab og panahon aron mohimamat sa ilang mga fans human sa ilang public sparring.
Sa laing bahin, si ALA vice president Dennis Cañete nagkanayon nga usa ka semana sa dili pa ang away, mangabot dinhi sa Sugbu ang mga langyaw'ng boksidor nga makigharong sa mga Pinoy fighters.
Gawas sa mga ALA fighters, makahigayon usab ang mga sports fans sa pakighimamat sa Philippine Men’s Tennis Team nga moduwa sa Davis Cup batok sa Team Japan karong Marso 4-6 didto sa Plantation Bay Resort and Spa sa Lapu-Lapu City. (BANATSPORTS)