CBA sugdan karong Domingo

CEBU, Philippines - Buksan na karong Domingo ang 1st M. Lhuillier Kwarta Padala-Cebu Basketball Association (MLKP-CBA) basketball tournament sa alas-4 sa hapon diha sa Cebu Coliseum.

Unom ka teams ang kompirmadong mosalmot sa CBA, ang bag-ong torneyo sa basketbol nga gilaumang mobanhaw sa kadasig sa amateur basketball dinhi sa Sugbu.

Lima sa unom ka teams ang mitambong kagahapon sa press conference didto sa Yayoy’s Grill.

Kini mao ang Asian College of Technology (ACT) Cyber Knights ni team owner ug Cebu City councilor Rodrigo 'Bebot' Abellanosa ug coach Titing Manalili, Ave Maria Sanctuary Park ni team owner Raffy Senining ug coach Edito Salacut, Hotel Fortuna ni Lorenzo 'Chao' Sy ug coach Pablo Yu, Mandaue City-Cebu Landmasters ni coach Roel Gomez ug ang Salazar Institute of Technology (SIT) Skyblazers ni coach Giovanni 'Jojo' Romarate.

Bugtong ang Talisay City ni team manager ug city councilor Rodi Cabigas ug coach Lawrence 'Tata' Merced ang wala makatambong tungod sa ilang line-up nga wala pa mahingpit.

Adunay kinatibuk-ang P400,000 ang gigahin nga ganti alang sa mga mananaog.

Ang kampiyon mobulsa og P200,000 nga maoy labing dakung premyo sa kasaysayan sa amateur basketball. Ang second placer makadawat og P100,000 ug ang third ug fourth placers makaangkon og P60,000 ug P40,000 matag usa.

Ang torneyo mosubay og single round robin format diin ang top 2 teams mo-abante sa semifinals isip seeded ug ang nahabiling upat ka teams ang magtinaktakay.  (BANATSPORTS)