CEBU, Philippines - Mag-abot na sab ang dalan sa higpit nga magkaribal, ang Green Coil ug Keiz BJ Motorsales karong gabii alang sa Game-2 sa ilang "best-of-three" final series sa "1st Keiz BJ Inter-Company basketball tournament karong gabii didto sa barangay Tabok gym sa Mandaue City.
Gilauman nga kulbahinam nga aksiyon ang masaksihan sa duha ka koponan tungod kay pareho kining nagpas-an og bug-at nga misyon.
Ang Green Coil nga miangkon sa Game-1 sa iskor nga 75-53 niadtong miaging gabii tinguhang haruson ang series aron hingpit nilang maangkon ang labing unang titulo sa liga.
Apan mas bug-at ang pas-anong krus sa Keiz BJ tungod kay kinahanglan sila nga modaog aron malugwayan pa ang series nga mao unya ang motukmod ngadto sa tinaktakay nga kampiyonato.
Mangu sa opensa sa Green Coil mao si Bade Payla, James Rosal ug Ramon Rago.
Itugyan usab ni coach Carlito Simbajon ang iyang pagsalig ngadto nilang Eugenio Tampus, Crisanto Montebon, Aiza Daño, Marvin Branzuela ug Dexter Calva.
Sa habig sa Keiz BJ, magsalig kini sa ilang 3-point king ug team owner Siegfred Ornopia uban nilang Jervie Ermac, Amboy Atiga, Athan Ariza ug Simoy Manija. (BANAT NEWS)