Mawin's Kitchen pabiling way pilde sa lima ka duwa
CEBU, Philippines - Ang Mawin's Kitchen nilang Maia Adriatico ug Sherwin Lequit mihaon sa ilang ikapitong sunod-sunod nga kadaugan human gipakaging ang AMBL, 85-78 sa MKBC 2011 summer basketball tournament didto sa Vicente Sotto Memorial Gym sa brgy. Punta Princesa.
Ang Mawin’s nabiyaan og 10 puntos sa first half, 25-35 pinaagi nilang Glen Birao, Tonix Carungay ug Yokyok Alesna, apan nakarekober kini ug ilang nasakmit ang labaw ug wala na kini mohatag og higayon sa AMBL nga makaapas.
Si Egin Taborada maoy nangu sa Mawin’s sa iyang 23 puntos, samtang ang beteranong point guard Lito Navarro, kinsa mihipos og 18 puntos lakip na ang lima ka three-pointers mao sab ang nangu sa AMBL nga adunay 4-1 nga baraha.
Sa sayo pa, ang Fatima milubong sa Emilmich ni Emily Badon, 93-55 sa pagpangulo ni Jack Echevarria nga mibahog og 30 puntos. Si Adriel Iyana miamot og 14 puntos, samtang ang ilang team captain Ronnie Canencia ug Butch Alentiojo mitampo og 12 puntos matag usa. Ang Emilmich gipangulohan ni Biboy Potencioso sa iyang 34 puntos.
Sa laing duwa, ang Brgy. Sambag midaog sab batok sa Scourge, 72-64.
Si Nikki Ibon maoy topscorer sa Brgy. Sambag nga miposa og 24 puntos, samtang gipangulohan sab ni Bogart Arco ang Scourge sa iyang 15 puntos. (BANATSPORTS)
- Latest
- Trending
