CEBU, Philippines - Miarangkada ang Lheo Autoshop sa ilang bangga batok sa JJTS aron moposte og daog, 92-90 sa kulbahinam nga aksiyon sa LLBA-Rollway Cup basketball tournament didto sa Villas Magallanes Gym sa Sta. Lucia Property sa Lapu-Lapu City.
Ang Lheo Autoshop miabante og kuwatro puntos paghuman sa unang kuwarter, 21-17, apan ang JJTS mi-rally sa ikaduhang kuwarter aron tablahon ang iskor, 42-all sa halftime ug paghuman sa third period nagtabla sab kini, 66-all.
Ang Lheo Autoshop ni team owner Leo Almacin miratsada sa fourth quarter aron sakmiton ang makutas nga kadaugan.
Si Noli Paquibot mimaneho og 25 puntos aron pangulohan ang Lheo Autoshop, gisundan ni Arman Lamoste sa iyang 24 puntos ug Rene Cuadra nga may 19 puntos. Ang napildeng JJTS gipangulohan sab ni Roland Cordero nga mitala og 18 puntos. Sila si John Taghoy ug Cacay Versoza parehong adunay 17 puntos.
Sa pasiunang duwa, ang AJY-Virlex ni team owner Alan Yu mipilde sa 3MRJ ni Renato Casinillo sa iskor nga 68-60.
Si Yu maoy nangu sa AJY pinaagi sa iyang 12 puntos, samtang ang 3MRJ gipangulohan sab ni Pompey Ngujo nga mibugha og 10 puntos.
Ang kompetisyon gipaluyohan sab sa Rollway Customs Brokerage ni Rolly dela Pieza ug sa JB Sportswear. (BANATSPORTS)