CEBU, Philippines - Walo ka sunod-sunod nga puntos ni Crisanto Montebon ug ang trapping defense sa nahabiling 2:48 sa final period maoy pabilo sa kadaugan sa Green Coil batok sa Cebu Horizon sa Game-2 sa ilang "best-of-three" semifinal series sa 1st Keiz BJ Inter-Company basketball tournament sa miaging gabii didto sa Barangay Tabok gym sa Mandaue City.
Kapila na kini buhata sa Green Coil nga mohimo’g trapping defense sa matag higayon nga maapekihan kini ilabi na gyud sa daginutong oras sa duwa.
Laay kaayo ang sitwasyon sa aksiyon sa unang 10 minutos kay ang Green Coil grabe kaayo nakabugwak sa ilang opensa hinungdan nga nalubong nila ang Cebu Horizon, 24-9 paghuman sa maong kuwarter.
Ang Cebu Horizons sa kombinasyon nilang Aljun Armian, Archie Urot ug Ted Añanucas mi-rally sa second half aron pahakan ang labaw ngadto na lang sa kuwatro puntos, 39-43 sa third period. Gani nakatabla pa kini sa sayong bahin sa final period, 43-all kortesiya ni Armian, kinsa mao sab ang nakapalabaw sa iyang team sa labing unang higayon, 46-45.
Napukaw ang nahinanok nga Green Coil ug si coach Carlito Simbajon mihimo'g kausaban sa game plan ug usa na niini trapping defense sa katapusang dos minutos nga nakaparatol sa kontra ug maoy nakahatag og higayon ni Montebon nga modagkot og walo ka sunod-sunod nga puntos aron mailog og balik ang labaw, 55-52 sa nahabiling 23 segundos.
Ang 3-pointer ni Ramon Rago maoy mikandado sa kadaugan sa Green Coil nga miabante sa finals uban sa Keiz BJ Motorsales, kinsa miharos sa Dedon.
Si Montebon maoy topscorer sa Green Coil nga miduslit og 17 puntos, gisundan ni Bade Payla nga midagkot og 15 puntos.
Ang pilderong Cebu Horizon gipangulohan ni Armian pinaagi sa iyang 17 puntos, samtang sila si Urot ug Añalucas miabuno og 14 puntos matag usa.
Mi-officiate sa maong duwa mao sila si Jeffy Narandan, Shornel Patalinghug. Sila si Bores Acompañado ug JC Narandan maoy table officials.
Gipasiugdahan sa magtiayong Siegfred ug Ellen Ornopia, ang torneyo usa sa mga kalihukan sa tinuig nga kapistahan sa Batang Hesus, Sr. Sto. Niño sa Upper Pagsabungan, Mandaue City karong Pebrero 26. (BANATSPORTS)