CEBU, Philippines - Nakahipos na og duha ka daog ang Catmon Elementary School belles dihang ilang gilampurnas ang University of San Carlos (USC) sa panagsangka nila sa 8th Shakeys Girls Volleyball League sa miaging adlaw didto sa Aznar Coliseum.
Gipamatuod sa Catmon belles nga sila lig-on ug dili katiaw-tiawan nga kontra bisan pa sa ilang kalinghod sa dihang gilupig nila ang mas taas pa nila og edad sa nagpadayong elimination phase ning tinuig nga volleyball tournament sa sekondarya.
Human sa ilang yanong kadaugan batok sa Abellana National School (ANS), 25-8, 25-10, ang Catmon miamong-among sab sa USC, 25-11, 25-19.
Ang grandslam Palarong Pambansa champion mihimo og impresibong labok pagsugod diin mitikdol kini og 12-0 run paingon na pagposte og 25-11 nga kadaugan sa first set.
Nakontrolar ang momentum sa Catmon ni coach Vilma Veloso sa second set uban sa ilang 7-0 run. Ang USC misuway og kitkit sa labaw, apan ang Catmon wala kapugngi sa ilang pangatake nga maoy mikandado sa duwa pinaagi sa 25-19 nga kadaugan.
Sila si Mae Angeli Montebon, Justine Dorog, Maria Lina Montebon, Wella Mae Ortega, Mary Angielou Castillo ug Chrisley Ann Sucalit maoy nangulo sa kadaugan sa batan-ong Catmon spikers.
Sa laing bahin, ang Pajo National High School ug Colegio dela Immaculada Conception (CIC)-Mandaue nidaog pinaagi sa forfeitures batok sa Paref-Southcrest.
Ang kampiyon maoy morepresentar sa rehiyon sa Shakeys G-League National karong Abril 4-9 didto sa University of St. La Salle-Bacolod sa Bacolod City. - BANAT NEWS