Maayong adlaw kanatong tanan ilabi na sa mga TIRADOR!
Malipayon kaayo ang mga Pinoy tungod sa pagdaog sa atong football team Azkals batok sa Mongolia niadtong Miyerkules sa gabii dihang ilang gilampaso sa iskor, 2-0 ang daw naratol nga booters nga kaliwat ni Kublai Khan ug Genghis Khan didto sa Panaad Stadium sa Bacolod City.
Ang Mongolian Blue Wolves gipakaging sa mga Asong Kalye (Azkals), maayo nalang nga dili “Irong Buang” ang napili nilang pangalan no?
Nakaingon gyud ko nga sa pagka karon aduna na gyu'y luna sa kasingkasing sa mga Pinoy ang duwang football tungod sa nakab-ot sa Azkals karong mga panahona.
Tiaw mo nang hasta ang mga edaran (tiguwang) namong silingan ug kadtong mahiligon sa basketbol wala mo-isnab sa pagtan-aw sa Studio 23 niadtong gabhiona, nagpanikad sa ilang mga tiil matag atake sa atong mga booters. Ug wala pa gyud matapos ang excitement kay pagkahuman sa duwa mao ra gihapoy gihisgutan.
Ang duha ka puntos gitagsahan nila ni Emelio 'Chiffy' Caligdong ug Phil Younghusband. Sa duha, mas kulbahinam ang kang Caligdong tungod kay lisud to ang iyang atake sa left side unya gipalusot sa bilahan adtong Mongolian goalie nga si Ariunbold Batsaikhan.
Pero nindot gihapon ang kang Younghusband tungod kay naghinapos na gud to nga oras. Sa habig gud sa Mongolia adtong mga taknaa daw mi-relax ang ilang mga defenders gawas lang sa ilang goalie maoy wala gyud ma-block ang bola nga maoy ikaduhang puntos sa mga Pinoy.
Matud pa sa mga report nga ‘tough nut to crack’ ang Mongolia, pero mura'g sa akong tan-aw mura lang sila og hinog nga lansones nga angayan lang pupuon sa maong duwa.
Kun atong i-review ang maong duwa, mas daghang attempts siguro ang PHL kumparar sa Mongols. Nagpasabot ni nga mas maayo ang teamwork sa mga Pinoy pag-abot sa opensa. Samtang mao usab ang sa depensa kay kanunay man silang mahatagan og kahigayonang makaatake.
* * *
Atong suportahan ang sunod nilang kampanya karong Marso didto sa nasud sa Mongolia alang sa ilang final meeting. Kun kita'y modaog niini nga elimination round ikabangga sa PHL ang mga Palestino, Siamese (Myanmar) ug Bangladeshi (Bangladesh). Kun mabulsa nato kini, tiket na kini alang sa umaabot nga AFC Cup sa sunod tuig.
* * *
Nagkakusog na ang popularidad sa Mixed Martial Arts (MMA) sa nasud tungod sa pagsikat og maayo sa UFC sa Western Countries nga diin adunay mga Pinoy nga nagduwa.
Kun buot subayon naggikan sa nagkalain-laing tradisyonal nga martial arts ang MMA (mao bitaw’ng mixed).
Ang dakung kalainan karon sa traditional martial arts ug MMA, mas estrikto dili lang sa techniques kun dili hasta sa pilosopiya, pamatasan, pamaagi sa pagtudlo, ang lineage sa art ug succession sa mga mahimong makatudlo.
Samtang sa MMA, pokus sila sa techniques ug disiplina, ang uban wala na kaayo importansya sa maong matang sa martial arts. Wala usab pili kun asa ka gikan nga traditional martial art schools o disiplina.
Alang sa MMA, importante makat-unan ang techniques nga imong magamit unya sa ring. Tungod kay ikaw may magdala sa imong kaugalingon sa ibabaw ug dili ang uban.
Atong hinumduman nga tungod usab sa MMA daghang mga kaniadto tradisyonal nga martial artist nga naputol na sa ilang lineage. Tungod sa nagkadaiyang hinungdan nasalbar ug nakabangon og balik.
Nakatukod sila og kaugalingong MMA schools bisan og wala na sila ilha pa sa ilang mga magtutudlo kaniadto.
Sa MMA walay monopolya nga mahitabo tungod kay ang matag estudyante kun maningkamot lang wala magkinahanglan pa og bendisyon sa iyang kanhi magtutudlo nga magtukod og kaugalingong gym or dojo.
Usa sa credentials karon sa natad sa MMA mao ang eksperiyensya sa usa ka magtutudlo ug dili ang kun asa gikan ang iyang certificate nga maoy sagad gi-practice sa traditional martial arts.
* * *
PAGTULON-AN. Ang batang dili badlungon sa iyang sayop sa bata pa, dili na mabadlong kun matiguwang na.