CEBU, Philippines - Buhi pa ang paglaum sa Green Coil, RMO Motor Parts nga makasulod sa semifinals dihang ilang giharos ang tagsa-tagsa nilang kaatbang sa Game-2 sa ìbest-of-threeî quarter-semis sa makalingawíng aksiyon sa 1st Keiz BJ Inter-Company Basketball Tournament niadtong Huwebes sa gabii didto sa barangay Tabok gym sa dakbayan sa Mandaue.
Ang Green Coil maoy nidiktar sa duwa gikan sa pagsugod hangtod nahuman aron dismantulon ang Keiz BJ Motor Parts, 66-45, samtang ang RMO nangayo og overtime sa wala pa nila taktaka ang Cast Alloy sa pisikal ug kulbahinam kaayo nilang duwa, 58-54.
Naglabaw ang Keiz BJ sa sayong bahin, 1-2 human sa tira ni R. Maquilan, apan gitirahan kini og tres ni Bade Payla aron sakmiton ang labaw, 4-2, ug sukad niadto wala na molingi pa ang Green Coil, nga nimintinar sa ilang double digits nga labaw. Ang Green Coil miposte sa ilang kinadak-ang labaw 23 puntos sa third period sa iskor nga 46-29 sa wala pa nila angkona ang kadaugan.
Topscorer sa Green Coil mao si Payla, kinsa miduslit og 20 puntos, gisundan ni Eugenio Tampus sa iyang 11 puntos ug James Rosal nga adunay 10 puntos.
Bugtong si M. Perez lang ang nakakuha og double figures alang sa natagak nga Keiz BJ pinaagi sa iyang 10 puntos.
Sa laing bahin, ang duwa sa RMO ug Cast Alloy maoy nakakawat og atensiyon sa mga tawo tungod sa karubo sa duwa nga miresulta sa pagka-teknikal nilang Banong Pulvera ug Benjie Nellas sa RMO ug nilang J. Otadora ug J. Salazar sa Cast Alloy.
Naglabaw unta og 10 puntos ang Cast Alloy sa third period, apan ang malditong RMO migamit og pisikal nga duwa nga maoy gihimo nilang hinagiban paglaslas sa labaw hangtod nga nakatabla, 51-all pinaagi sa duha ka free throws ni W. Lopez hinungdan sa overtime.
Si Edu Wangkig maoy nangu sa RMO nga miarangkada og 14 puntos, samtang si Rustom Bordario miratsada og 10 puntos.
Ang pilderong Cast Alloy gipangulohan sab ni J. Otadora pinaagi sa iyang 21 puntos, gisundan ni M. Bontog nga miabuno og 12 puntos.
Sama sa Green Coil ug RMO, nahayagan sab ang paglaum sa Pro Speed Racing nga makaambit og lingkoranan sa semis human ilang gipilde ang CSI sa iskor nga 61-52.
Si N. Ducay mi-iskor og 15 puntos, samtang si Jack Jubay mihipos og 12 aron pangulohan ang Pro Speed.
Sila si R. Rodrigo ug R. Noynay miukay og 17 ug 14 puntos aron pangulohan sab ang CSI.
PUNTOS MATAG USA
Unang duwa:
GREENCOIL (66) - Payla 20, Tampus 11, Rosal 10, Branzuela 8, Calva 7, DaÒo 6, Mareveles 4
KEIZ BJ MOTOR PARTS (45) - M. Perez 10, J. Perez 4, R. Maquilan 3, Alingaro 2, Lessen 2, Congson 2, B. Perez 2
Ikaduhang duwa:
RMO MOTOR PARTS (58) - Wangkig 14, Bordario 10, Pulvera 8, Capada 8, Nellas 7, Erenia 5, Gurreh 4, Lopez 2
CAST ALLOY (54) - Otadora 21, Bontog 12, Salazar 9, Sevilla 5, Barquio 4, Damayo 2, Railrail 1
Ikatulong duwa:
PROSPEED RACING (61) - Ducay 15, J. Jubay 12, Grondiano 7, Salazar 7, G. Jubay 6, R. Jubay 5, Monsales 4, B. Jubay 3, Obligado 2
CSI (52) - Rodrigo 17, Noynay 14, Fuentes 9, Reyes 7, Mier 5