Keiz BJ motor sales naka-ipsot

CEBU, Philippines - Nangayo pa og overtime ang Keiz BJ Motor Sales sa wala pa nila maangkon ang kulbahinam nga kadaugan batok sa Pro Speed, 55-53 sa nagkainit nga aksiyon sa 1st Keiz BJ Inter-Company Basketball Tournament sa miaging gabii didto sa Barangay Tabok gym sa Mandaue City.

Upat lang ka players ang nakapuntos alang sa Keiz BJ, apan nakahimo gihapon kini sa pag-eskapo gikan sa bangis nga Pro Speed.

Sa naandan, si Keiz BJ team owner Siegfred Ornopia maoy topscorer sa kadaugan nga mipabuto og 22 puntos, lakip na ang iyang game-high unom ka triples.

Ang duha ka kampo parehong mipabuhagay sa ilang mga opensa uban ang hugot nga depensa nga mihatod sa duwa ngadto sa overtime, 51-all.

Sayo unta nga maangkon sa Keiz BJ ang kadaugan dihang milabaw kini og dos puntos, 51-49 sa daginutong oras, apan si JC Obligado mitanom sa iyang labing mahinungdanong tirada aron tablahon ang duwa.

Sa dugang singko minutos, padayon gihapon nga nagsinukliay og mga puntos ang duha ka kampo hangtod na sa himalatyong oras, apan si Amboy Antiga mipasud sa iyang perimeter shot aron luwason ang Keiz BJ.

Si Richard 'D.I.' Nellas mitimang og 16 puntos, samtang si Atiga mitimbre og nuybe puntos ug si Raquel Pangagsa Perez miugkat og 8 puntos alang sa Keiz BJ nga nagbitbit na karon og 5-0 nga baraha.

Ang pilderong Pro Speed gipangulohan ni Langgido Grondiano pinaagi sa iyang 16 puntos, gisundan ni Renante Jubay nga adunay 12 puntos.

Sa laing bahin, nakasud na sa semis ang Cebu Horizon human nila gilubong ang Cast Alloy sa iskor nga 68-54.

Ang maong kompetisyon nahimong posible pinaagi sa mga paningkamot ni Ellen Ornopia, ang bise presidente sa Sector-6 chapel sa Barangay Pagsabungan, Mandaue City.

Halad usab kini sa magtiayong Ornopia alang sa tinuig nga kapistahan sa Batang Hesus Senor Sto. NiÒo karong Pebrero 26.

Giabagan sab kini ni Moises Manesa nga maoy committee uban nila ni Shornez Patalinghug ug Jerry Narandan nga maoy mga referees.

Puntos Matag Usa

keiz bj mOTOR sales (55) - ornopia 22, Nellas 16, Antiga 9, Perez 8

PRO SPEED (53) - Langgido 16, R. Jubay 12, G. Juban 9, J. Jubay 6, Gomez 6, Monsales 2, Obligado 2

Ikaduhang duwa:

CEBU HORIZON (68) - Montejo 15, Armian 12, Perez 10, Mulleta 8, Veraces 8, Urot 6, Yero 4

CAST ALLOY (54) - Otadora 17, Dione 11, Salazar 10, Gumalas 8, Bird Man 4, Barquio 4 .  - BANAT NEWS