CEBU, Philippines - Gipangpilde ni Johnny Carzano ang iyang mga kaatbang aron paghari sa seniors division sa Barangay Bulacao Fiesta Chess Tournament didto sa Bulacao Sports Complex sa Talisay City.
Mipatigbabaw si Carzano batok ni Rolando Arcipe alang sa taas nga dapit, samtang si Ernesto Marquez mitapos sa ikatulo.
Mikompleto sa top nine placers mao sila si Dennis Gonzales, Vicmel Pepito, Edwin Abolencia, Junry Siloy, Cris Aligaga ug Alberto Acabo.
Sa juniors division, si Reyd Jayson Ortuoste maoy miangkon sa titulo, samtang sila si Daniel Lorenzo Minoza ug Sherwin Amad mi-okupar sa ikaduha ug ikatulo nga dapit. Si John Rynyl Panal nahimutang sa ikaupat, gisundan ni James Rizo.
Sa kiddies class, si Adonis Manlise mao ang mipatigbabaw, samtang sila si Ivan John Campaner ug Mardion Parolim mipahiluna sa ikaduha ug ikatulo nga dapit.
Ang duha ka adlaw nga torneyo gipasiugdahan sa PMS Chess Club Inc. sa pagpangulo sa ilang presidente nga si Loreto Powao ug gisuportahan sab kini sa barangay opisyal sa Bulacao ubos sa liderato ni Brgy. Capt. Raul Cabanero. (BANAT NEWS)