CEBU, Philippines - Malampusong nadepensaan ni OPBF bantamweight champion Malcolm Tuñacao ang iyang bakus batok sa Japanese challenger nga si Daigo Nakahiro pinaagi sa sixth round TKO didto sa Prefectural Gymnasium sa Osaka, Japan.
Sa maong kadaugan ang 32-anyos ug kanhi WBC flyweight titleholder nga si Tuñacao posibling makakuha og kahigayunan alang sa usa ka world title fight.
Usa sa mga gitan-aw karon mao ang pakigsangka ni Tuñacao alang sa WBA bantramweight championship batok sa Panamanian nga si Anselmo Moreno.
Grabeng midominar si Tuñacao sa ilang sangka ni Nakahiro kinsa wala na kaantos ug misurender nalang sa 2:32 sa sixth round human gipauwanan og nagpungasi nga kinumo sa Mandauehanong boksidor.
Gawas ni Nakahiro, nakatilaw na usab sa kastigo gikan ni Tuñacao ang unang duha ka hapon nga misuway pag-ilog sa iyang bakus nga sila si Kohei Oba ug Hidenobu Honda.
Si Tuñacao misaka karon sa record nga 28-2-3, 17KOs, samtang ang Japanese crowd-favorite nga si Daigo nakahiagum sa ikaupat niyang pilde sulod sa 27 ka away. - BANAT NEWS