Bautista, Barrera nagpasingitay atol sa press conference

CEBU, Philippines - Nagkita pag-usab ang mortal nga kaaway nga si ALA Boxing Gym stalwart Rey 'Boom Boom' Bautista ug Alejandro 'Zorrito' Barrera unom ka bulan human sa ilang kontrobersiyal nga away.

Sa ilang panagkita kagahapon, si Bautista ug si Barrera sa Mexico nagbinaharay sa umaabot nilang "rematch" nga maoy main event sa "Pinoy Pride 3" ugma sa gabii didto sa Pacific grand ballroom sa Waterfront Cebu City Hotel and Casino sa Brgy. Apas, ning siyudad.

Human madunggi ang pangangkon ni Barrera nga sayon ra siyang tumbahon tungod sa iyang huyang nga depensa ug apapangig, si Bautista (29-2, 22KOs) mibawos sab ug milabay sa iyang mahait nga pulong ngadto ni Barrera (21-4, 14KOs) nga iyang gihulagway nga   huyang og lawas.

"Tan-awon lang unya nato kun kinsa namong duha ang dili lig-on og panga," matud pa ni   Bautista atol sa final press conference kagahapon didto sa Waterfront. "Moangkon ko na maayong boksidor si Barrera pero weak iyang body."

Ang trainer nga si Edmund Villamor miangkon nga grabeng kalamboan ang iyang nakita ni Bautista human kini mipaubos sa strength and conditioning training sa giya ni ALA Stable conditioning coach Pio Solon.

Ang garbo sa Candijay, Bohol, namahayag usab nga wala siya mahudlat sa pagkuha sa kampo ni Barrera ni kanhi Mexican world champion   Daniel Ponce de Leon, ang unang boksidor nga mipilde kaniya.

"Nalipay gani ko nga nakig-spar siya (Barrera) ni De Leon kay napukaw ang akong kasuko. Human nako ni Barrera, ako isunod si De Leon," dugang pa ni Bautista.

Apan ang trainer ni Barrera nga si Victor Hugo Correa daling mitubag ngadto ni Bautista nga dili una mangandoy sa pakigsangka pag-usab si De Leon tungod kay mas bug-at nga suliran ang angay niyang sulbaron sa away niya batok ni Barrera.

Atol sa una nilang sangka, si Bautista midaog pinaagi sa controversial fourth round TKO. Gihunong ang away human si Barrera nakaangkon og gisi sa walang bahin sa iyang kilay.

Ang mga hurado mihukom nga ang gisi naggikan sa legitimate punch, apan ang kampo ni Barrera ang dili makadawat ug midemanda kini og "rematch."

"Changing the doctor is not an issue anymore cause we’re going to knock Boom Boom out," matud ni Correa.

Sa supporting main event, si WBO Asia-Pacific Youth lightweight champion Jason Pagara (24-1, 13KOs) makigharong ni Billy Sumba (18-2, 4 KOs) sa Indonesia.

Mo-away sa undercard si former WBC Silver flyweight champion Edrin 'The Sting' Dapudong (20- 3, 11KOs) batok ni Sofyan 'The Cobra' Effendi (10-10, 8KOs) sa Indonesia, samtang si Roli Gasca (15-1, 3KOs) makigpinaksitay ni Joash Aparecio (7-3, 4KOs) sa Cagayan de Oro.

 Sa laing bahin ang official weigh-in himuon karong alas-11 sa buntag diha sa SM City-Cebu atrium.BTC. - BANAT NEWS