So pinigil ng Chinese GM, kasalo pa rin sa liderato

WIJK AAN ZEE, Netherlands - Napigil ang apat na sunod na ratsada ni Filipino GM Wesley So nang matalo kay Li ng China sa kanilang laban sa ninth round sa 73rd Tata Steel-Corus Group B chess championship dito sa de Morianne Communtiy Center.

Hindi kinaya ng Gruenfeld defense ng 17-anyos na si So ang atake ni Li matapos ang 34 moves.

Nagmula ang tubong Bacoor, Cavite sa isang four-game winning streak bago natalo sa Chinese player.

Bagamat natalo, nakasalo pa rin ni So sa top spot sina GM Gabriel Sargissian ng Armenia, tumalo kay top seed GM Zadek Wojtaszek ng Poland, at GM Luke McShane ng England, nakipag-draw kay GM Jon Ludvig Hammer ng Norway.  

Kapwa may mga 6.0 points sina So, Sargissian at McShane papasok sa mahalagang tenth round ng torneo kasunod sina GM Zahar Efimenko (5.5 points) ng Ukraine at GM Vlad Tkachiev ng France (5.5 points).

Nakatakdang harapin ni So si Tkachiev, nasa isang three-game winning roll matapos manalo kina Hammer, Efimenko at GM Surya Ganguly ng India.

Matapos si Tkachiev, susunod na makakatapat ni So sina GM Friso Nijboer ng Netherlands sa 11th round, McShane sa 12th round at Wojtaszek sa 13th at final round.