Bautista mohimo'g public work-out diha sa SM City

CEBU, Philippines - Ipakita ni Filipino featherweight contender Rey 'Boom Boom' Bautista nga andam na siya sa umaabot niyang sangka batok sa Mehikanong si Alejandro 'Zorrito' Barrera sa main event sa "Pinoy Pride 3: The Rematch" karong Enero 29 diha sa Waterfront Cebu City Hotel and Casino.

Si Bautista mohimo sa iyang pre-event public workout diin iladlad ang bunga sa iyang training sud sa pipila ka buwan atubangan sa mga Cebuano boxing fans karong Sabado didto sa SM-City Cebu Atrium.

Paningkamotan ni Bautista nga mohimo og impresibong kadaugan aron mapapas ang mga pagduda sa mga kritiko niya kalabot sa iyang katakus nga subling moaway alang sa world title.

Ang una nilang sangka ni Barrera niadtong Agosto sa miaging tuig, miresulta sa usa ka kontrobersiyal nga fourth round TKO pabor ni Bautista human giundang sa ring physician ang away tungod sa dakung gisi sa kilay sa bisitang boksidor.

Apan nangugat ang kampo ni Barrera nga dili angay ihatag ni Bautista ang daog tungod kay gisi nga naangkon sa ilang boksidor mugna sa headbutt ug dili gikan sa suntok.

Uban ni Bautista sa public workout   mao ang iyang   stablemates nga sila si lightweight prospect Jason Pagara ug PABA bantamweight titlist Roli Gasca.

Si Pagara mo-away sa supporting bout batok ni Indonesian Billy Sumba, samtang si Gasca makigharong ni Joash Aparicio sa undercard. – BANAT NEWS