Ambasa ang reyna

CEBU, Philippines - Usa ka dakung surpresa ang gibuhat sa taga-Davao nga si Monalisa Ambasa sa women’s class, samtang gidominaran ni Kenyan Benjamin Kipkazi ang men’s open sa 42-kilometer full marathon sa 2nd Cebu City Marathon kagahapon didto sa Asiatown I.T. Park sa Brgy. Apas, ning syudad.

Ang fourth placer sa miaging National Milo Marathon nga si Ambasa mipukan sa mga lig-ong contender nga sila si Mary Joy Tabal ug Susan Jemutai Kiptoo sa Kenya.

Sikit ang away tali nila ni Ambasa ug sa rising teen running sensation nga si Tabal sa katapusang dos kilometro sa away, apan mipatigbabaw ang kasinatian sa beteranang si Ambasa aron masakmit ang korona.

Si Ambasa milabang sa finish line sud sa tulo ka oras ug 14 minutos, labaw og usa ka minuto sa oras ni Tabal. Ang third placer nga si Kiptoo mirehistro og oras nga 3:16.

Samtang sa men’s division, giharus sa mga Kenyan ang unang upat ka luna sa pagpangulo ni Kipkazi sa oras nga 2:35.00, Phil Renoa (2:37.35), Abraham Missos (2:37.42) ug Anthony Nerza (2:39.00) sa ikaduha ngadto sa ikaupat nga pwesto.

Ang kanhi National Milo Marathon champion nga si Cresenciano Sabal mao ang bugtong Pinoy nga nakasikit sa mga Kenyan sa oras nga 2:39.10 alang sa ikalimang dapit.

Sa men’s 21K, si Ian Bernido (1:13.57) ang migawas nga mananaug, gisundan nila ni Kenyan Willy Kepkemoi Roticia (1:14.11) ug Adonis Singson (1:14.17) sa ikaduha ug ikatulong dapit.

Si Mary Grace delos Santos mao ang reyna sa women’s division sa oras nga 1:11.20, samtang sila si Christy Sevilleno Tutor (1:35.18) ug Jojilyn Pepito (1:14.08) ang migawas nga second ug third placer.

Ang 5k category giharian ni Joel Delposo (16:10.22) sa men’s class, samtang si Crizel Diongson (21:20) maoy miangkon sa women’s category. - BANAT NEWS