Tabal andam na sa 2nd Cebu City Marathon

CEBU, Philippines - Lab-as pa gikan sa iyang pagsud sa top three sa 42K sa miaging National Milo Marathon, ang pambato sa Sugbu nga si Mary Joy Tabal masentro na sab karon sa tibuok Cebu running community sa iyang pagdagan sa 2nd Cebu City Marathon karong Domingo.

Ang 22-anyos ug graduating student sa kursong BS Commerce sa Southwestern University (SWU), duha ka buwan kapin nga nangandam alang sa labing daku ug engrandeng marathon sa siyudad sa Sugbu.

"Grabe ang training, MWF sa outside school like sa Talamban. Unya sa oval diri sa SWU campus kung Saturday," matud pa ni Tabal.

Sama sa miaging National Marathon, hugot nga kompetisyon usab ang atubangon ni Tabal tungod kay bisan pa og walay female Kenyan runner, aduna may mga elite female runners sa nasud ang nagtinguhang mobabag kaniya.

"Naa si Mary Grace Delos Santos ang “Cebu running queen”, sunod si Aileen Tolentino, ang champion last year ug ang runner gikan sa Davao nga si Monalisa Ambasa," matud pa ni Tabal. "Ang ako lang e-enjoy ang dagan kay kun maghuna-huna ko niana ma-distruct rako."

Si Tabal, kinsa nakadawat og dakung suporta gikan ni SWU athletic director Ryan Aznar, mipahigayon sa katapusan niyang ensayo kagahapon uban sa iyang coach ug teammate nga si Philip Dueñas. (BANATSPORTS)