Bautista, Pagara mopahigayo'g public sparring

CEBU, Philippines - Aron pagpakita sa bunga sa pipila ka buwan nilang training, ang mga ALA fighters nga sila si Rey 'Boom Boom' Bautista ug Jason Pagara mopahigayon og public sparring session ugmang adlawa diha sa Piazza sa Park Mall sa north reclamation area.

Ang WBC international featherweight champion nga si Bautista, maoy moaway sa main event, samtang ang WBO AsPac youth lightweight champion nga si Pagara sa supporting bout sa "Pinoy Pride 3-The Rematch” karong Enero 29 diha sa Waterfront Cebu City Hotel and Casino.

Si Bautista manalipod sa iyang balwarte sa usa ka rematch batok sa Mehikanong si Alejandro 'Zorrito' Barrera.

Kahinumduman, nahimong kontrobersiya ang resulta sa una nilang sangka niadtong miaging tuig sa "Philippines vs. the World" boxing card.

Ang fast-rising ALA star nga si Pagara mopakita usab sa iyang kaandam alang sa umaabot niyang binukbukay batok sa Indonesian nga si Billy Sumba.

Uban nila ni Bautista ug Pagara nga mosaka sa ring alang sa usa ka public sparring mao ang PABA bantamweight super champion nga si Roli Gasca. 

Si Gasca moharong sa bisitang si Joash Aparecio sa Cagayan de Oro City sa undercard. - BANAT NEWS