Egera, Magbanua magbinukbukay sa Asiatown IT Park

CEBU, Philippines - Magkuros ang dalan ni Philippine Boxing Federation (PBF) super bantamweight titlist Jason Egera ug sa Braveheart boxer Rolando Magbanua sa main event sa ALA-Cobra Tunay Na Lakas "Boxing's Best" karong Enero 15 diha sa Asiatown I.T Park sa Brgy. Apas, ning siyudad.

Si Magbanua mao ang mihulip ni ALA Boy Larry 'Bon Jovi' Canillas nga mao unta ang moharong ni Egera, apan nakahiagum kini og injury atol sa training.

Dili kini ang unang higayon ni Magbanua (19-1, 14KOs) nga moaway dinhi sa Sugbu tungod kay niadtong miaging tuig, ang Mindanao fighter mihimo'g impresibong kadaugan dihang iyang gipaundang ang Mehikanong si Jose Angel Cota sa round six.

Samtang si Egera (13-5, 6 KOs) laraw nga manimalos human siya langkati sa iyang WBO Asia-Pacific bantamweight title sa stablemate ni Magbanua nga si Jundy Maraon niadtong Pebrero, 2009 diha sa Cebu Coliseum.

Mokompleto sa undercard mao ang sangka nila ni ALA knockout artist James Bacon batok ni Jake Verano sa Cagayan de Oro, Albert Pagara batok Sandy Cajil sa DDP stable, Jomar Cordinillo sa Tagbilaran City batok Marlon Talili sa Jagna, Bohol, Michael Romarate sa ALA Gym batok Rardo Espeleta sa Butuan City ug Sugbuanong si Richard Barrios batok ni Crispin Salvador sa Futalan Stable. - BANAT NEWS