1st Argao Mud-Trail Run gikatakda sa Enero 23

CEBU, Philippines - Laing dakung lumba ang mahitabo sa habagatang bahin sa Sugbu sa pagsikad sa 1st Argao Mud-Trail Run sa Enero 23 didto sa Argao Nature Park.

Gibahin sa duha ka kategoriya -- 7K mud-trail open ug 3K open, ang lumba namugna aron makatigom og salapi alang sa ika-26 nga kasaulogan sa World Youth Day didto sa Argao.

Uban sa kompetisyon, makahigayon usab ang mga partisipante sa pagtagbaw sa mga maanindot nga suruyanan didto sa Argao sama sa Argao Zoo, Zipline ug ang nabantog nga “Balay sa Agta”.

Gawas sa mga ganting salapi sa top three finisher sa matag kategoriya, makadawat usab og special prizes ang mga modaog sa best in costume, dirtiest profile ug dirtiest couple.

Sa mga interesadong mosalmot, ang registration fee nagkantidad og P200 libre na niini ang head gear, race bib, mapa ug snacks.

Ang registration sugdan sa Enero 3 diha sa RUNNR sa Ayala Center-Cebu ug Philippine Sports Commission Office sa Cebu City Sports Center sa Enero 10.   (BANAT NEWS)