Pacman mipili na

CEBU, Philippines - Sukwahi sa unang gipadagan nga storya, gibutyag karon ni Top Rank Inc. CEO Bob Arum nga nakapili na si WBO welterweight champion Manny Pacquiao og boksidor nga iyang sangkaon sa Mayo 7 didto sa MGM Grand Hotel and Casino sa Las Vegas.

Matud pa ni Arum nga human sa katapusan nilang meeting ni Pacquiao sa wala pa sila migikan paingun sa Estados Unidos, mipakanaug og hukom si Pacquiao kinsa mipili na gikan nila ni Shane Mosley, Juan Manuel Marquez ug Andre Berto, nga maoy iyang sangkaon sunod tuig.

Apan giklaro ni Arum nga dili pa niya kini mamahimong ibutyag tungod kay kinahanglan pa niya nga tun-an ang mga detalye aron seguraduon nga wala'y buslot ang buhaton nilang kontrata sa maong away.

“Manny made his pick, he gave me the name,” matud pa ni Arum sa boxingscene.com. “But now I have to go make the best possible economic deal with that opponent. I’m not telling you or anyone else who it is. I will be back in the Top Rank office on Monday and I will go to work to structure the right deal.”

Niadtong Sabado, gisangyaw sa Canadian adviser ni Pacquiao nga si Michael Koncz nga dangtan pa og duha ka semana una pa masayran sa tibuok boxing world ang pinal nga detalye sa kung kinsa gyud ang sunod atubangon ni Pacman ibabaw sa ring.