Tulo ka lain-laing kalihukan sa paugnat sa kusog ang ipahigayon karong gabii ug usa na niini ang awarding ceremony sa bag-o lang natapos nga Lucio 'Guy' Lim Sr. Memorial Cup basketball tournament diha sa CAP Building sa Osmeña Blvd., ning dakbayan.
Ang Lite Shipping ni team owner Niño Imboy maoy koronahan isip hari sa maong liga. Ang Cebu Movers System (CMS) ni Dr. Boy Te maoy ikaduha, samtang ang Aisle Marine Services ug FAL Shipping ni team owner Raymund 'The Baby Face Assassin' Revilles maoy miangkon sa ikatulo ug ikaupat nga dapit.
Sa laing bahin, ang Ave Maria Sanctuary Park nga misakmit sa ilang ikaunom nga titulo sud sa tulo ka buwan, mopahigayon og Christmas Party. Ang Ave Maria ni team Raffy Senining maoy usa sa labing malampusong low-profile team dinhi sa Sugbu.
Ang ikatulong kalihukan mao ang Christmas Party sa mga sakop sa Guadalupe Athletic Association (GAA) diha sa Guadalupe Sports Complex. (BANAT NEWS)