Melindo mopahigayo'g public workout sa SM karong hapon

CEBU, Philippines - Ipakita ni WBC Youth Intercontinental flyweight champion Milan Melindo nga andam na siya alang sa labing dakung away sa iyang karera sa ipahigayong public workout karong alas-3 sa hapon diha sa SM City- Cebu Atrium.

Si Melindo, usa sa mga world title prospect sa nasud makigharong ni kanhi world champion Carlos Tamara sa Colombia sa ilang 10-round non-title bout sa main event sa "Pinoy Pride 2" karong Nobiyembre 27 diha sa Waterfront Cebu City Hotel and Casino.

Ang lumad nga taga-Cagayan De Oro anaa na sa final phase sa iyang training ug ipakita niya ang tanang bunga sa dul-an duha ka buwan niya nga subsob nga ensayo sa usa ka light training diha sa SM City Atrium uban nila ni Rocky Fuentes ug Randy Suico.

Ang OPBF champion nga si Fuentes ug junior welterweight nga si Suico pulos usab mo-away sa undercard sa "Pinoy Pride 2" nga gipasiugdahan sa ALA Promotions ug sa ABS-CBN Sports.

Si Fuentes makigsangka ni Inthanon Sithchamuang sa Thailand, samtang si Suico moharong sa iyang kababayan nga si Arnel Tinampay. – BANAT NEWS