PCCL Sweet 16 sugdan karon

CEBU, Philippines - Nagkaduol ang posibilidad sa panagbagat pag-usab kon "rematch" tali sa University of Cebu (UC) Webmasters batok sa University of the Visayas (UV) Green Lancers tungod kay tuyo sa duha ka higanteng teams nga palagputon ang ilang kaatbang karong adlawa sa pagsugod sa Sweet 16 Finals sa Philippine Collegiate Champions League (PCCL) Cebu Basketball Festival diha sa Cebu Coliseum.

Gawas lang kun sukwahi ang mahitabo ug sila hinuon maoy matagak.

Sugdan sa Webmasters ug sa Lancers ang ilang kampanya sa Sweet 16, apan kinahanglan una nilang tagakon ang ilang mga kaatbang karong adlawa.

Ang Lancers makigsangka batok sa VisMin Zonal top qualifiers University of San Carlos (USC) Warriors, samtang ang Webmasters makigsangka batok sa University of Iloilo Wildcats.

Ang duwa kuhaan og buhing paghulagway sa Studio 23.

Ang opening ceremonies pagatambungan ni Cebu City Mayor Michael L. Rama, isip guest of honor ug siya sab ang mohimo sa ceremonial toss.

Molamas sa opening program mao ang dance exhibitions sa UC ug UV dance troupes.

Mosamot kamabulokon ang Sweet 16 tungod kay dinhi mismo sa atong tugkaran magtinagakay ang duha ka inilang teams gikan sa Manila -- ang UAAP losing finalists Far Eastern University (FEU) Tamaraws ug ang NCAA third placer Jose Rizal University (JRU) Heavy Bombers nga preliminary game sa giatngan sa mga Sugbuanon nga UC-UV showdown.  – BANAT NEWS