Warriors miihaw sa Wildcats sa PCCL

CEBU, Philippines - Wala moila og bisita ang University of San Carlos (USC) Warriors dihang ilang gilubong ang nanulong nga University of Iloilo Wildcats, 87-74 sa Vis-Mis Zonals of the Philippine Collegiate Champions League (PCCL) Cebu Basketball Festival kagahapon didto sa Cebu Coliseum.

Ang Warriors uban sa laing local bet Southwestern University (SWU) Cobras   makigpinaksitay batok sa tagsa-tagsa nila ka kaatbang karong adlawa aron moabante ngadto sa sunod nga round ug dumot nga duwa ang nagpaabot kanila batok sa top two teams sa Cebu Schools Athletic Foundation Inc. (CESAFI).

Ang topseed sa elimination phase makigbatok sa CESAFI second placer University of the Visayas (UV) Green Lancers, samtang ang second-seeded makigtigi batok sa reigning champion University of Cebu (UC) Webmasters.

Nakarekober ang bisitang koponan human gilubong og 16 puntos sa third period, apan wala kini makasugakod ug igo lang kini nakasikit ngadto sa tres puntos, 60-63 human sa basket ni Bernard Tibor.

Upat ka Warriors ang mikutlo og double figures nga gipangulohan ni Giovanni Padillo ug Sam Hermosa nga adunay 18 ug 17 puntos matag usa.

Si Michael Cantonao adunay 15 puntos ug si Mark Gil Panerio miabuno og 14 puntos alang sa Warriors, kinsa nakakuha sab og maayong suporta gikan nilang Jabe Bautista ug Mel Steven Duran.

Ang pilderong Wildcats-Iloilo gipangulohan ni Arturo Aquitania, kinsa mipabuto og 22 puntos, samtang si Tibor mitira og 19 puntos. (BANATSPORTS)