PCCL VisMin elim sugdan na

CEBU, Philippines - Sugdan karon ang kulbahinam nga aksiyon sa Philippine Collegiate Champions League (PCCL) VisMin Zonal eliminations diha sa Cebu Coliseum diin ang mga lokal nga basketball fans makasaksi na usab sa duwa sa Southwestern University (SWU) Cobras ug sa University of San Carlos (USC) Warriors batok sa mga bisitang koponan gikan sa Davao City ug Iloilo City.

Unang mosalida ang Cobras karong alas-4 sa hapon batok sa Agro Industrial Foundation Sailors sa Davao ug sundan kini sa duwa tali sa Warriors ug sa University of Iloilo Wildcats sa alas-6 sa gabii.

Ang maghatag og lamas niining VisMin Zonals nga maoy dalan padulong sa Sweet 16 mao ang pagbisita unya dinhi sa Sugbu sa FEU Tamaraws, ang UAAP runner-up ug sa Jose Rizal University Heavy Bombers, ang NCAA third placer, ning maong kompetisyon nga gipaluyohan sa PLDT-Smart.

Si Cebu City Mayor Michael L. Rama maoy pinasidunggang dinapit sa opening ceremonies sa PCCL VisMin Zonals nga gitawag og "Cebu Basketball Festival." Gawas pa niana, mopasundayag sab ang mga inilang mga dance troupes gikan sa mga CESAFI member schools aron mohatag og dugang bulok sa opening ceremonies.

Ang ABS-CBN network kinsa maoy media partner sa PCCL, maoy mosalida sa duwa sa Studio 23 sports channel.

Ang University of Cebu (UC) Webmasters nga maoy CESAFI champion ug ang runner-up University of the Visayas (UV) Green Lancers automatic nang nakakuha og luna alang sa Sweet 16 ug dili na sila angay pang mosalmot sa Vismin Zonals.

Mao kini ang labing unang higayon nga ang dakbayan sa Sugbo maoy mo-host sa opening games sa Sweet 16 Finals.

Ang Webmasters ug ang   Lancers mobukas sa ilang kampanya sa Sweet 16 pinaagi sa pakigsangka batok sa mga mananaog sa VisMin zonal qualifying nga ubos sa knockout format.

Ang maluwas sa Sweet 16 nga ilhon sab isip overall champion sa Southern Islands, mo-abante sab ngadto sa Final Four didto sa Manila.  (BANATSPORTS)