ASK nidominar sa Smart karate kids tourney
CEBU, Philippines - Mipatigbabaw ang Advocacy for the Strengthening of Karatedo (ASK) sa Visayas-Mindanao leg sa 2010 Smart Karate Kids Tournament diha sa Parkmall, siyudad sa Mandaue.
Ang ASK mipupo og 17 gold, 13 silver ug walo ka bronze medals human sa duha ka adlaw nga kompetisyon.
Si Tracy Lynne Basalo maoy nangulo sa ASK human siya mikabkab og duha ka bulawan sa World Karate Federation girls 12-13 kumite category ug sa kata 13-15 girls class.
Gawas ni Basalo, unom usab niya ka teammates nga sila si Erhimlord Labura ug Masa Saragoza sa 8-9 class, Jeremiah Pantalba sa boys’ 12-13, Jefferson Quiamco sa boys’16-17 ug Allan Abraham sa boys’-60 category ang mipakita sa ilang katakus.
Mitunol sab og golds alang sa ASK si Joshua Famador sa boys’ 13-15 advance kata ug Keisha Ruth Lamiaga sa girls’ 10-15 class.
Lain pang mihatag og bulawan alang sa ASK mao sila si Marjorie Villareal, Theresa Lechuza ug Jimpaul Punay sa intermediate kata division, Mac Jonard Paitic, Efronne Ezra Tan, Warlito Ponteros, Raynand Christ Largo ug Francis Joaquin Cabrera sa novice kata.
Ang Japan Karate Association (JKA) maoy mipahiluna sa ikaduha bitbit ang 7-7-10, gold-silver-bronze medals, gisundan sa SSK sa ilang 5-2-6 medal tally ug AUK nga adunay tagtulo ka gold, silver ug bronze medals. (BANATSPORTS)
- Latest
- Trending
