CEBU, Philippines - Misutoy lang sa tungason nga dalan ang cyclist nga si Eusebio Ravanes diin iyang giangkon ang kampiyonato sa All-Mountainbike Challenge didto sa Brgy. Busay, ning siyudad.
Gawas sa lisud nga agianan, mibabag usab ni Ravanes ang 31 ka mga mountainbikers nga nakiglumba kaniya sa usa ka free-for-all competition. Bisan pa sa daghang mga babag, siya gihapon ang mipatigbabaw human niya gihuman ang lumba sud sa tres minutos ug 15 segundos.
Gawas sa medalya, si Ravanes mibulsa sab og P5,000 nga ganting salapi. Nagsunod niya mao sila si Joseph Miller (3:28) ug Perlito Colegado (3:55) nga mi-okupar sa ikaduha ug ikatulo nga dapit.
Si Richie Gonzaga (3:27) nga mao unta ang makakuha sa ikaduhang dapit, nalabay ngadto sa ikalima tungod sa penalty sa iyang paglapas sa balaod. Si Cliff dela Cruz mipahiluna sa ikaupat.
Nanghawod usab sa ilang tagsa-tagsa ka dibisyon sa downhill event sila si Geronimo Alguno ug Carlos Russell.
Si Russell mi-oras 59.84 aron pildehon ang iyang mga runners-up nga sila si Paul Kevin Yu (1:00.34) ug Victor Baganon (1:01.12) sa open category.
Samtang si Alguno misakiyo sa titulo sa beginner’s class sa oras nga 1:11.09 batok nila ni Joer Cañete (1:11.72) ug Marsius Valdehueza (1:13.46).
Ang lumba gipasiugdahan sa Cebu Extreme Bikers’ Union (CEBU) ug sa Citi Avenue Bikeshop. – BANAT NEWS