Dela Pieza miburak og 38 puntos

CEBU, Philippines - Angay nga ipasigarbo ni Rolly dela Pieza ang maong duwa tungod kay sa labing unang higayon, mirehistro kini'g career-high 38 puntos nga nakatabang og daku sa Yellow team paghaw-as og kulbahinam nga kadaugan batok sa Violet sa Inter-color division sa Phase 3 Camella Homes Sunday Club basketball tournament didto sa Villas Magallanes gym sa Lapu-Lapu City.

Sikit kaayo nga nagtakus ang duha ka koponan halos sa kinatibuk-ang duwa diin natapos ang halftime sa iskor nga 58-57, pabor sa Yellow ni team owner Rolly dela Pieza.

Sa kanipis sa labaw, nailog sa Violet ang momentum sa third quarter sa giya ni Alan Sepe ug sukad niadto nagbinumbahay ang duha ka kampo, apan ang Violet maoy mipatigbabaw paghuman sa maong kuwarter, 92-88.

Takulahaw lang nga nausab ang tonada, dihang sila si Dela Pieza, Centes Brañanola ug Ramil Cortes mipahungaw sa ilang kainit susama kainit sa haring adlaw aron ilogon pagbalik ang labaw hangtod nga nakalabang kini sa makutas nga duwa.

Gawas ni Dela Pieza nga mi-iskor og double figures, si Centes miabuno sab og 31 puntos, samtang si Cortes misansan og 21 puntos. Sila si Leo Almacin ug Bebot Pleños nagkumboya og 29 puntos sa maong kadaugan.

Si Sepe mao sab ang nangu sa nasugamak nga Violet pinaagi sa iyang 27 puntos, gisundan nilang Amay Palad ug Jun Geraldez nga parehong mitikdol og 21 puntos. Si Ruelan Sumilang mitampo og 18 puntos, si Toto Villapez adunay 15 ug si Alex Balberona miariya og 11 puntos.

Sa Inter-company division, ang Rollway Freighters sa pagpangulo ni Allen Dinol mipilde sa Ryle Trucking sa iskor nga 93-86.  (BANATSPORTS)