Banal-Perez rematch"

CEBU, Philippines -  Hayan adunay mahitabong "rematch" tali nila ni AJ 'Bazooka' Banal ug Luis Alberto Perez human sa "controversial" nila nga sangka sa main event sa "Pinoy Pride" boxing extravaganza diha sa Waterfront Cebu City Hotel and Casino diin si Banal midaog pinaagi sa seventh round disqualification.

Dihang gipangutana siya human sa away kun moaway ba alang sa usa ka rematch, mismo si Banal ang mipadayag nga andam siyang mosangka pagbalik batok sa kanhi two-time world champion.

Nakugang ang tanang nanan-away tungod sa grabeng gipakita nga labok sa duha ka   bantamweight prospects.

Si Banal nidominar sa unang unom ka rounds, apan nadutlan siya sa mga kombinasyon gikan ni Perez sa round seven. Tataw kaayo nga nasakitan, si Banal migakos ngadto ni Perez aron maputol ang pagpangataki sa bisitang boksidor.

Apan dihang uwangon   unta sila ni referee Silvestre Abainza, kalit lang nga mibuhi og makusog nga hook si Perez nga miigo sa ulo ni Banal. Tungod sa kakusog sa maong suntok, daw nalipong ug nakakita'g mga aninipot si Banal, kinsa nagisian usab sa iyang walang kilay.

Pipila ka minuto ang milabay, ang mga hurado mipakanaog og hukom nga "disqualification" nga kadaugan ngadto ni Banal, kinsa naglabaw usab sa scorecard, 59-55, 59-55 ug 60-54.

Gumikan niini, miulbo ang kaspa sa manedyer ni Perez nga si Mario Antonio Garcia Fonseca, kinsa mibutyag nga mosang-at sila og protesta ngadto sa International Boxing Federation (IBF) ug sa World Boxing Organization (WBO).

“This decision doesn’t work for me,” matud pa ni Fonseca. “He is a good boxer only in five rounds, Banal will never be a world champion.”

Sa iyang bahin, gisabot ni ALA Promotions president Michael Aldeguer ang opinyon ni Fonseca, apan giklaro niya nga tataw kaayo nga dakung sayop ang gihimo sa Nicaraguan boxer.

Dili usab mosupak si Aldeguer kun mangayo ang kampo ni Perez og "rematch" nga posibleng adto himuon sa Estados Unidos.

Sa supporting bout, yano kaayong gidispatsar ni Mark Jason Melligen ang Mehikanong si Bladimir Hernandez pinaagi sa TKO sa third round, samtang ang lightweight prospect nga si Jason Pagara mipatumba ni Sapapetch Sor Sakaorat sa second round.

Ang ilang stablemate nga si Larry Canillas mao ang wala mabuligi'g suwerte kay napilde kini ngadto sa beteranong si Ramie Laput. (BANATSPORTS)