Amit bumangon, pasok sa semis

MANILA, Philippines - Itinaas pa ni Rubilen Amit ang antas ng paglalaro nang talunin nito si Line Kjoersvik ng Norway, 8-2, para makapasok sa se­mifinals sa idinadaos na 2010 Yalin Women’s World 10-ball Championship sa Robinson’s Galleria.

Sinamantala ni Amit ang mga masasamang tum­bok ng kalaban para ma­kaabot sa semifinals at makakaharap nga niya ang dating world champion na si Ga Young-Kim ng Korea na tinalo ang kababayang si Eun Ji Park, 8-1.

Bago si Kjoersvik, kinailangan muna ng 28-anyos na si Amit, ang nagdedepensang kampeon ng torneo, na magpakatibay bago nalusutan sina Joanne Ashton ng Canada, 8-2, at Han Yu ng China, 8-7, na ni­laro naman sa Nuvo City sa Libis, Quezon City.

Kay Yu muntik-muntikan ng namaalam si Amit matapos makaabante ang Chinese lady cue artist sa 6-7 iskor.

Pero may kung anong suwerte ang kumapit kay Amit dahil dalawang bola na lamang ang natitira para sa panalo ni Yu nang na­isab­lay nito ang mahirap na tira sa 9-ball.

Madaling naipasok ni Amit ang object ball bago isinunod ang 10-ball para magtabla sa 7-all.

Magandang sargo naman ang nagresulta para sa madaling paghulog sa 10 bolang nakalatag upang umabante ang Pinay champion laban kay Kjoers­vik.

Naniniwala naman si Amit na balikatan ang la­banan nila ni Ga na mang­yayari sa ikatlong pagkakataon sa kanilang mga careers.

“Mahusay siya at nag­hati kami sa tig-isang pa­nalo sa unang dalawang pagkikita. Alam kong magkakasukatan kami rito,” wika ni Amit.

Si Amit na lamang ang natitirang kumakampanya para sa host country sa torneong sinahugan ng $75,000 at ang manana­lo rito ay mag-uuwi ng $20,000.

Pinaglabanan naman nina Karen Corr ng Ireland at Jasmine Ouschan ng Austria at sina Kelly Fisher ng England at Li Jia ng China ang huling dalawang puwesto sa semifinals.