Martin salig ni Melligen

CEBU, Philippines - Dili na angay kuwestiyonon kun modaog ba ang batos ni Tony Martin nga si Mark Jason Melligen tungod kay matud pa niya nga seguradong mopatigbabaw gyud ang ALA fighter sa iyang away sa "Pinoy Pride" boxing extravaganza karong Sabado diha sa Waterfront Cebu City Hotel and Casino.

Ang Las Vegas trainer nga si Martin, kinsa maoy responsable sa kalampusan ni Melligen didto sa Estados Unidos, wala malisang sa bahad ni Mexican knockout artist Bladimir Hernandez nga tumbahon ang iyang boksidor pinaagi sa body punch.

"Mark is too fast, too strong for him. He (Hernandez) said he will attack Mark’s body? But his body will move too," matud pa ni Martin sa Philboxing.com.

Si Martin anaa karon dinhi sa Sugbu aron ubanan si Melligen sa maong away.

Sa laing bahin, magkita sa labing unang higayon ang ALA boxers ug mga langyaw'ng kaatbang sa final press conference karong alas-11 sa buntag diha sa Waterfront Hotel and Casino.

Ang official weigh-in himuon ugma diha sa SM Entertainment Center. (BANAT)